ອະບາຍມຸຂ

ພຣະຍາຍົມຈຶ່ງກ່າວຢ່າງນີ້ວ່າ: ດູກ່ອນທ່ານ ທ່ານບໍ່ໄດ້ກະທຳຄວາມດີທາງກາຍ ທາງວາຈາ ທາງໃຈໄວ້ ເພາະມົວປະມາທເສຍ ດັ່ງນີ້, ເຫລົ່ານາຍນິຣະຍະບາລຈັກລົງໂທສໂດຍອາກາຣທີ່ທ່ານປະມາທແລ້ວ ກໍບາບກັມນີ້ນັ້ນແລ ບໍ່ແມ່ນມາຣດາກະທຳໃຫ້ທ່ານ ບໍ່ແມ່ນບິດາກະທຳໃຫ້ທ່ານ ບໍ່ແມ່ນອ້າຍນ້ອງຊາຍກະທຳໃຫ້ທ່ານ ບໍ່ແມ່ນເອື້ອຍນ້ອງຍິງກະທຳໃຫ້ທ່ານ ບໍ່ແມ່ນມິຕອະມາຕກະທຳໃຫ້ທ່ານ ບໍ່ແມ່ນຍາຕສາຍໂລຫິຕກະທຳໃຫ້ທ່ານ ບໍ່ແມ່ນສະມະນະຫລືພຣາມກະທຳໃຫ້ທ່ານ ບໍ່ແມ່ນເທວະດາກະທຳໃຫ້ທ່ານ ຕົວທ່ານເອງກະທຳເຂົ້າໄວ້ ທ່ານເທົ່ານັ້ນຈັກສເວີຍວິບາກຂອງບາບກັມນີ້.

ພິກຂຸທັງຫລາຍ! ພຣະຍາຍົມຄັນປອບໂຍນ ເອົາອົກເອົາໃຈໄຕ່ຖາມເຖິງເທວະທູຕທີ ໒ ກັບສັຕນັ້ນແລ້ວ ຈຶ່ງປອບໂຍນ ເອົາອົກເອົາໃຈໄຕ່ຖາມເຖິງເທວະທູຕທີ ໓ ວ່າ:

ດູກ່ອນທ່ານ! ທ່ານບໍ່ໄດ້ເຫັນເທວະທູຕທີ ໓ ປາກົຕຢູ່ໃນໝູ່ມະນຸສຫລື?

ສັຕນັ້ນທູລຢ່າງນີ້ວ່າ: ຂ້ານ້ອຍບໍ່ເຫັນເລີຍ ຂ້ານ້ອຍ!

ພຣະຍາຍົມຈຶ່ງຖາມຢ່າງນີ້ວ່າ: ດູກ່ອນທ່ານ ທ່ານບໍ່ໄດ້ເຫັນຍິງຫລືຊາຍຜູ້ປ່ວຍໄຂ້ ໄດ້ຮັບທຸກຂະເວທະນາ ເປັນໄຂ້ໜັກ ນອນເປື້ອນມູຕຄູຖຂອງຕົນ ມີຜູ້ອື່ນຄອຍພະຍຸງລຸກ ພະຍຸງເດີນ ຢູ່ໃນໝູ່ມະນຸສຫລື?

ສັຕນັ້ນທູລຢ່າງນີ້ວ່າ: ເຫັນ ຂ້ານ້ອຍ!

ພຣະຍາຍົມຈຶ່ງຖາມຢ່າງນີ້ວ່າ: ດູກ່ອນທ່ານ ທ່ານຮູ້ຄວາມ ມີສະຕິ ເປັນຜູ້ໃຫຍ່ແລ້ວ ໄດ້ມີຄວາມດຳຣິຢ່າງນີ້ແດ່ບໍວ່າ:

ແມ່ນແຕ່ເຮົາກໍມີຄວາມເຈັບໄຂ້ເປັນທັມມະດາ ບໍ່ລ່ວງພົ້ນຄວາມເຈັບໄຂ້ໄປໄດ້ ຄວນທີ່ເຮົາຈະທຳຄວາມດີທາງກາຍ ທາງວາຈາ ທາງໃຈ?

ສັຕນັ້ນທູລຢ່າງນີ້ວ່າ: ຂ້ານ້ອຍບໍ່ສາມາດ ຂ້ານ້ອຍ ມົວປະມາທເສຍ ຂ້ານ້ອຍ!

ພຣະຍາຍົມຈຶ່ງກ່າວຢ່າງນີ້ວ່າ: ດູກ່ອນທ່ານ ທ່ານບໍ່ໄດ້ກະທຳຄວາມດີທາງກາຍ ທາງວາຈາ ທາງໃຈໄວ້ ເພາະມົວປະມາທເສຍ ດັ່ງນີ້, ເຫລົ່ານາຍນິຣະຍະບາລຈັກລົງໂທສໂດຍອາກາຣທີ່ທ່ານປະມາທແລ້ວ ກໍບາບກັມນີ້ນັ້ນແລ ບໍ່ແມ່ນມາຣດາກະທຳໃຫ້ທ່ານ ບໍ່ແມ່ນບິດາກະທຳໃຫ້ທ່ານ ບໍ່ແມ່ນອ້າຍນ້ອງຊາຍກະທຳໃຫ້ທ່ານ ບໍ່ແມ່ນເອື້ອຍນ້ອງຍິງກະທຳໃຫ້ທ່ານ ບໍ່ແມ່ນມິຕອະມາຕກະທຳໃຫ້ທ່ານ ບໍ່ແມ່ນຍາຕສາຍໂລຫິຕກະທຳໃຫ້ທ່ານ ບໍ່ແມ່ນສະມະນະຫລືພຣາມກະທຳໃຫ້ທ່ານ ບໍ່ແມ່ນເທວະດາກະທຳໃຫ້ທ່ານ ຕົວທ່ານເອງກະທຳເຂົ້າໄວ້ ທ່ານເທົ່ານັ້ນຈັກສເວີຍວິບາກຂອງບາບກັມນີ້.

ພິກຂຸທັງຫລາຍ! ພຣະຍາຍົມຄັນປອບໂຍນ ເອົາອົກເອົາໃຈໄຕ່ຖາມເຖິງເທວະທູຕທີ ໓ ກັບສັຕນັ້ນແລ້ວ ຈຶ່ງປອບໂຍນ ເອົາອົກເອົາໃຈໄຕ່ຖາມເຖິງເທວະທູຕທີ ໔ ວ່າ:

ດູກ່ອນທ່ານ! ທ່ານບໍ່ໄດ້ເຫັນເທວະທູຕທີ ໔ ປາກົຕຢູ່ໃນໝູ່ມະນຸສຫລື?

ສັຕນັ້ນທູລຢ່າງນີ້ວ່າ: ຂ້ານ້ອຍບໍ່ເຫັນເລີຍ ຂ້ານ້ອຍ!

ພຣະຍາຍົມຈຶ່ງຖາມຢ່າງນີ້ວ່າ: ດູກ່ອນທ່ານ ທ່ານບໍ່ໄດ້ເຫັນຣາຊາທັງຫລາຍໃນໝູ່ມະນຸສຈັບໂຈຣຜູ້ປະພຶຕຜິດມາແລ້ວ ສັ່ງລົງໂທສຕ່າງຊະນິດແດ່ຫລື ຄື:

ຕີດ້ວຍແສ້ແດ່,

ຕີດ້ວຍຫວາຍແດ່,

ຕີດ້ວຍກະບອງສັ້ນແດ່,

ມັດມືແດ່,

ມັດຕີນແດ່,

ມັດທັງມືທັງຕີນແດ່,

ຕັດຫູແດ່,

ຕັດດັງແດ່,

ຕັດທັງຫູທັງດັງແດ່,

ລົງໂທສດ້ວຍວິທີ ໝໍ້ຄ້ຽວນ້ຳມັນແດ່,

ລົງໂທສດ້ວຍວິທີ ຂອດສັງຂ໌ແດ່,

ລົງໂທສດ້ວຍວິທີ ປາກຣາຫູແດ່,

ລົງໂທສດ້ວຍວິທີ ມາລັຍໄຟແດ່,

ລົງໂທສດ້ວຍວິທີ ຄົບມືແດ່,

ລົງໂທສດ້ວຍວິທີ ລິ້ວສ່າຍແດ່,

ລົງໂທສດ້ວຍວິທີ ນຸ່ງເປືອກໄມ້ແດ່,

ລົງໂທສດ້ວຍວິທີ ຢືນກວາງແດ່,

ລົງໂທສດ້ວຍວິທີ ກ່ຽວເຫຍື່ອເບັດແດ່,

ລົງໂທສດ້ວຍວິທີ ຫລຽນກະຫາປະນະແດ່,

ລົງໂທສດ້ວຍວິທີ ແປງແສບແດ່,

ລົງໂທສດ້ວຍວິທີ ກາງວຽນແດ່,

ລົງໂທສດ້ວຍວິທີ ຕັ່ງຟາງແດ່,

ລາດດ້ວຍນ້ຳມັນຮ້ອນໆແດ່,

ໃຫ້ໝາກັດ-ຊິດແດ່,

ໃຫ້ນອນຫງາຍເທິງຫລາວທັງເປັນໆແດ່,

ຕັດຫົວດ້ວຍດາບແດ່,

ສັຕນັ້ນທູລຢ່າງນີ້ວ່າ: ເຫັນ ຂ້ານ້ອຍ!

ພຣະຍາຍົມຈຶ່ງຖາມຢ່າງນີ້ວ່າ: ດູກ່ອນທ່ານ ທ່ານຮູ້ຄວາມ ມີສະຕິ ເປັນຜູ້ໃຫຍ່ແລ້ວ ໄດ້ມີຄວາມດຳຣິຢ່າງນີ້ແດ່ບໍວ່າ:

ໂຮ! ເປັນອັນວ່າ ສັຕທີ່ກະທຳກັມຊົ່ວໄວ້ນັ້ນ ຍ່ອມຖືກລົງໂທສຕ່າງຊະນິດເຫັນປານນີ້ໃນປັຈຈຸບັນ ຈະກ່າວຫຍັງເຖິງຊາຕໜ້າໜໍ ຄວນທີ່ເຮົາຈະທຳຄວາມດີທາງກາຍ ທາງວາຈາ ທາງໃຈ?

ສັຕນັ້ນທູລຢ່າງນີ້ວ່າ: ຂ້ານ້ອຍບໍ່ສາມາດ ຂ້ານ້ອຍ ມົວປະມາທເສຍ ຂ້ານ້ອຍ!