ປຶ້ມຄູ່ມືຄຸນນະທັມ

ບຸກຄົນໃນໂລກນີ້ຄື ບຸຕ, ພັນລະຍາ, ຂ້າທາສ, ຫລືຄົນໃຊ້ ເອີ້ນວ່າ ໄຟຄືຶ ຄະຫະບໍດີ; ສະນັ້ນ ໄຟຄືຄະຫະບໍດີ ຈຶ່ງຄວນສັກກາຣະ ເຄົາຣົົບ ນັບຖື ບູຊາ ຄວນບໍຣິຫານໃຫ້ເປັນສຸຂໂດຍຊອບ.

ກໍ ໄຟ ຄື ທັກຂິເນີຍຍະບຸກຄົນນັ້ນ ເປັນແນວໃດໜໍ ?

ຄື : ສະມະນະພຣາມໃນໂລກນີ້ ງົດເວັ້ນຈາກຄວາມມົວເມົາປະມາດ ຕັ້ງຢູ່ໃນຂັນຕິ ແລະ ໂສຣັຈຈະ ຝຶກຝົນຈິຕໃຫ້ສະຫງົບ ດັບຮ້ອນໄດ້ເປັນເອກ ນີ້ເອີ້ນວ່າ ກໍໄຟຄື ທັກຂິເນີຍຍະບຸກຄົນ; ສະນັ້ນ ໄຟຄືທັກຂິເນີຍຍະບຸກຄົນ ຈຶ່ງຄວນສັກກາຣະ ເຄົາຣົົບ ນັບຖື ບູຊາ ຄວນບໍຣິຫານໃຫ້ເປັນສຸຂໂດຍຊອບ.

ດູຣາພຣາມ ! ໄຟ ໓ ກອງນີ້ແລ ຄວນສັກກາຣະ ເຄົາຣົົບ ນັບຖື ບູຊາ ຄວນບໍຣິຫານໃຫ້ເປັນສຸຂໂດຍຊອບ.

ຄູ່ມືຄຸນນະທັມສໍາລັບເຍົາວະຊົນ

ບົດທີ ໑໓

ຜູ້ຂ້າມານດາບິດາ ຍ່ອມໄປສູ່ອະບາຍ ໄປສູ່ນະຣົກເດືອດຮ້ອນ ແກ້ໄຂບໍ່ໄດ້

ສະບັບຫລວງ ໒໒/໑໓໒-໑໓໓/໑໒໙

ພິກຂຸທັງຫລາຍ ! ບຸກຄົນ ໕ ຈໍາພວກນີ້ຕ້ອງໄປສູ່ອະບາຍ ຕ້ອງໄປນະຣົກ ແກ້ໄຂບໍ່ໄດ້ ; ບຸກຄົນ ໕ ຈໍາພວກນັ້ນເປັນແນວໃດໜໍ ? ຄື :

ບຸກຄົນຜູ້ຂ້າມານດາ ໑

ບຸກຄົນຜູ້ຂ້າບິດາ ໑

ບຸກຄົນຜູ້ຂ້າພຣະອະຣະຫັນຕ໌ ໑

ບຸຄົນຜູ້ມີຈິຕປອງຮ້າຍ ເຮັດໃຫ້ພຣະພຸດທະເຈົ້າ

ເລືອດອອກ ໑

ບຸກຄົນຜູ້ທໍາລາຍສົງຄ໌ໃຫ້ແຕກກັນ ໑

ພິກຂຸທັງຫລາຍ ! ບຸກຄົນ ໕ ຈໍາພວກນີ້ແລ ຕ້ອງໄປອະບາຍ ຕ້ອງໄປນະຣົກ ແກ້ໄຂບໍ່ໄດ້.

ຄໍາສັ່ງສອນຂອງພຣະຕະຖາຄົດເຈົ້າ

ບົດທີ ໑໔

ໜ້າທີ່ທີ່ຕ້ອງປະຕິບັດຕໍ່ທິດເບື້ອງໜ້າ

ສະບັບຫລວງ ໑໑/໑໙໕-໒໘໖/໑໗໔

ຄະຫະບໍດີບຸຕ ! ທິດເບື້ອງໜ້າ ຄື ມານດາບິດາ ອັນບຸຕຄວນປະຕິບັດຕໍ່ ໂດຍຖານະ ໕ ປະການຄື :

໑. ເພິ່ນລ້ຽງເຮົາມາແລ້ວ ຮູ້ຈັກລ້ຽງເພິ່ນຕອບ

໒. ເຮົາຈະເຮັດວຽກຂອງທ່ານ

໓. ເຮົາຈະດໍາຣົງວົງຕະກູນ

໔. ເຮົາຈະປະພຶດຕົນໃຫ້ສົມເປັນທາຍາດ

໕. ເມື່ອເພິ່ນທໍາກາລະລ່ວງລັບໄປແລ້ວ ເຮັດບຸນອຸທິດຫາ.

ຄະຫະບໍດີບຸຕ ! ທິດເບື້ອງໜ້າຄື ມານດາບິດາ ອັນບຸຕປະຕິບັດຕໍ່ໂດຍຖານະ ໕ ປະການເຫລົ່ານີ້ແລ້ວ ຍ່ອມອະນຸເຄາະບຸຕ ໂດຍຖານະ ໕ ປະການ ຄື :

໑. ຫ້າມບໍ່ໃຫ້ເຮັດຊົ່ວ

໒. ໃຫ້ຕັ້ງຢູ່ໃນຄວາມດີ

໓. ໃຫ້ສຶກສາສິລະປະວິທະຍາ

໔. ໃຫ້ມີຄູຄອງທີ່ເໝາະສົມ

໕. ມອບມໍຣະດົກໃຫ້ເມື່ອສົມຄວນແກ່ເວລາ

ເມື່ອເປັນດັ່ງນີ້ ທິດເບື້ອງໜ້ານັ້ນ ເປັນອັນວ່າກຸລະບຸຕນັ້ນ ປິດກັ້ນແລ້ວເປັນທິດກະເສມ ບໍ່ມີໄພເກີດຂຶ້ນ.

ຄໍາສັ່ງສອນຂອງພຣະຕະຖາຄົດເຈົ້າ

ບົດທີ ໑໕

ໜ້າທີ່ທີ່ຕ້ອງປະຕິບັດຕໍ່ທິດເບື້ຶອງຂວາ

ສະບັບຫລວງ ໑໑/໑໙໕-໒໘໖/໑໗໔.

ຄະຫະບໍດີບຸຕ ! ທິດເບື້ອງຂວາ ຄື ຄູອາຈາຣຍ໌ ອັນສິດຄວນປະຕິບັດຕໍ່ໂດຍຖານະ ໕ ປະການຄື :

໑. ດ້ວຍການລຸກຂຶ້ນຢືນຮັບ

໒. ດ້ວຍການເຂົ້າໄປຄອຍຮັບໃຊ້

໓. ດ້ວຍການເຊື່ອຟັງຢ່າງຍິ່ງ

໔. ດ້ວຍການອຸປະຖາກກິດຈະການງານຕ່າງໆ

໕. ດ້ວຍການສຶກສາສິລະປະວິທະຍາໂດຍເຄົາຣົບ

ຄະຫະບໍດີບຸຕ ! ທິດເບື້ອງຂວາຄື ຄູອາຈາຣຍ໌ ອັນສິດປະຕິບັດຕໍ່ໂດຍຖານະ ໕ ປະການເຫລົ່ານີ້ແລ້ວ ຍ່ອມອະນຸເຄາະສິດໂດຍຖານະ ໕ ປະການ ຄື :

໑. ແນະນໍາໃນທາງທີ່ດີ

໒. ໃຫ້ສຶກສາດີ

໓. ບອກສິລະປະວິທະຍາໂດຍບໍ່ປິດບັງ

໔. ເຮັດໃຫ້ເປັນທີ່ຮູ້ຈັກໃນມິຕສະຫາຍ

໕. ໃຫ້ການຄຸ້ມຄອງ ໃນທິດຕ່າງໆ

ເມື່ອເປັນດັ່ງນີ້ ທິດເບື້ອງຂວານັ້ນ ເປັນອັນວ່າກຸລະບຸຕນັ້ນ ປິດກັ້ນແລ້ວ ເປັນທິດກະເສມ ບໍ່ມີໄພເກີດຂຶ້ນ.

ຄໍາສັ່ງສອນຂອງພຣະຕະຖາຄົດເຈົ້າ

ບົດທີ ໑໖

ໜ້າທີ່ທີ່ຕ້ອງປະຕິບັດຕໍ່ທິດເບື້ອງຫລັງ

ສະບັບຫລວງ ໑໑/໑໙໕-໒໘໖/໑໗໔.

ຄະຫະບໍດີບຸຕ ! ທິດເບື້ອງຫລັງຄື ພັນລະຍາ ອັນສາມີຄວນປະຕິບັດຕໍ່ໂດຍຖານະ ໕ ປະການ ຄື :

໑. ດ້ວຍການຍົກຍ້ອງ

໒. ດ້ວຍການບໍ່ດູໝິ່ນ

໓. ດ້ວຍການບໍ່ປະພຶດນອກໃຈ

໔. ດ້ວຍການມອບຄວາມເປັນໃຫຍ່ໃນໜ້າທີ່ໃຫ້

໕. ດ້ວຍການໃຫ້ເຄື່ອງປະດັບ

ຄະຫະບໍດີບຸຕ ! ທິດເບື້ອງຫລັງຄື ພັນລະຍາ ເມື່ອສາມີປະຕິບັດຕໍ່ໂດຍຖານະ ໕ ປະການເຫລົ່ານີ້ແລ້ວ ຍ່ອມອະນຸເຄາະສາມີ ໂດຍຖານະ ໕ ປະການ ຄື :

໑. ຈັດແຕ່ງວຽກງານດີ

໒. ຊ່ວຍເຫລືອຍາດພີ່ນ້ອງຂອງສາມີ

໓. ບໍ່ປະພຶດນອກໃຈ

໔. ຮັກສາຊັບທີ່ສາມີຫາມາໄດ້

໕. ດຸໝັ້ນຂະຫຍັນຂັນແຂງໃນວຽກງານທັງຫລາຍ