ຄູ່ມືກາຣຈະເຣີນເມຕຕາ

ພິກຂຸທັງຫລາຍ! ອີກປະກາຣໜຶ່ງ ພິກຂຸເປັນຜູ້ມີສີລທີ່ບໍ່ຂາດ ບໍ່ທະລຸ ບໍ່ດ່າງ ບໍ່ພ້ອຍ ເປັນອິສສະຣະ ອັນວິນຍູຊົນສັນລະເສີນ ບໍ່ມີອັນໃດຄອບງຳ ເປັນໄປເພື່ອສະມາທິ ເຖິງຄວາມເປັນຜູ້ມີສີລສະເໝີກັນກັບເພື່ອນສະພຣົມມະຈາຣີທັງຫລາຍ ທັງໃນທີ່ແຈ້ງແລະທີ່ລັບ ແມ່ນແຕ່ທັມນີ້ກໍເປັນເຫຕໃຫ້ຣະນຶກເຖິງກັນ ທໍາຄວາມຮັກກັນ ທຳຄວາມເຄົາຣົພກັນ ເປັນໄປເພື່ອຄວາມສົງເຄາະກັນ ເພື່ອຄວາມບໍ່ວິວາທຜິດຖຽງກັນ ເພື່ອຄວາມພ້ອມພຽງກັນ ເພື່ອຄວາມເປັນພວກດຽວກັນ.

ພິກຂຸທັງຫລາຍ! ອີກປະກາຣໜຶ່ງ ພິກຂຸມີທິຕຖິອັນໄກຈາກຂ້າເສິກ ເປັນນິຍຍານິກະທັມ ອັນນຳອອກເຊິ່ງບຸຄຄົລຜູ້ກະທຳຕາມນັ້ນ ເພື່ອຄວາມສິ້ນທຸກຂ໌ໂດຍຊອບ ເຖິງຄວາມເປັນຜູ້ສະເໝີກັນດ້ວຍທິຕຖິເຊັ່ນກັບເພື່ອນສະພຣົມມະຈາຣີທັງຫລາຍ ທັງໃນທີ່ແຈ້ງແລະທີ່ລັບ ແມ່ນແຕ່ທັມນີ້ກໍເປັນເຫຕໃຫ້ຣະນຶກເຖິງກັນ ທຳຄວາມຮັກກັນ ທຳຄວາມເຄົາຣົພກັນ ເປັນໄປເພື່ອຄວາມສົງເຄາະກັນ ເພື່ອຄວາມບໍ່ວິວາທຜິດຖຽງກັນ ເພື່ອຄວາມພ້ອມພຽງກັນ ເພື່ອຄວາມເປັນພວກດຽວກັນ.

ພິກຂຸທັງຫລາຍ! ທັມ ໖ ປະກາຣນີ້ແລ ເປັນເຫຕໃຫ້ຣະນຶກເຖິງກັນ ແລະທຳຄວາມຮັກກັນ ທຳຄວາມເຄົາຣົພກັນ ເປັນໄປເພື່ອຄວາມສົງເຄາະກັນ ເພື່ອຄວາມບໍ່ວິວາທກັນ ເພື່ອຄວາມພ້ອມພຽງກັນ ເພື່ອຄວາມເປັນພວກດຽວກັນ.

ພິກຂຸທັງຫລາຍ! ທິຕຖິອັນໄກຈາກກິເລສອັນເປັນຂ້າເສິກ ເປັນນິຍຍານິກະທັມ (ທັມທີ່ນຳສັຕອອກຈາກທຸກຂ໌)

ນໍາອອກເຊິ່ງບຸຄຄົລຜູ້ກະທໍາຕາມນັ້ນ ເພື່ອຄວາມສິ້ນທຸກຂ໌ໂດຍຊອບນີ້ ເປັນຍອດຢຶດຄຸມທັມ ໖ ປະກາຣນີ້ ທີ່ເປັນເຫຕໃຫ້ຣະນຶກເຖິງກັນ.

ພິກຂຸທັງຫລາຍ! ປຽບເໝືອນຍອດອັນເປັນທີ່ສູງສຸດ ເປັນທີ່ຢຶດຄຸມຂອງຫລັງຄາເຮືອນສັນໃດ ທິຕຖິອັນໄກຈາກກິເລສອັນເປັນຂ້າເສິກ ເປັນນິຍຍານິກະທັມ ນຳອອກເຊິ່ງບຸຄຄົລຜູ້ກະທຳຕາມນັ້ນ ເພື່ອຄວາມສິ້ນທຸກຂ໌ໂດຍຊອບນີ້ ເປັນຍອດຢຶດຄຸມທັມ ໖ ປະກາຣນີ້ ທີ່ເປັນເຫຕໃຫ້ຣະນຶກເຖິງກັນ ສັນນັ້ນ.

ມັຊຊິມະນິກາຍ ມູລປັນນາສກ໌ ໑໒/໔໑໒-໔໑໓/໕໔໒

ເຣື່ອງພິກຂຸຖືກງູກັດຈົນມໍຣະນະພາບ

ເນື່ອງຈາກບໍ່ໄດ້ຈະເຣີນເມຕຕາ

ສມັຍໜຶ່ງ ພຣະຜູ້ມີພຣະພາຄປະທັບຢູ່ທີ່ພຣະວິຫາຣເຊຕະວັນ ອາຣາມຂອງທ່ານອະນາຖະບິນດິກະເສດຖີ ໃກ້ພຣະນະຄອຣສາວັຕຖີ ໃນສມັຍນັ້ນ ພິກຂຸອົງຄ໌ໜຶ່ງໃນພຣະນະຄອຣສາວັຕຖີຖືກງູກັດຈົນມໍຣະນະພາບ ຄັ້ງນັ້ນ ພິກຂຸຈຳນວນຫລາຍເຂົ້າໄປເຝົ້າພຣະຜູ້ມີພຣະພາຄເຖິງທີ່ປະທັບ ອະພິວາທແລ້ວ ນັ່ງໃນທີ່ຄວນສ່ວນຂ້າງໜຶ່ງ ຄັນແລ້ວໄດ້ກຣາບທູລພຣະຜູ້ມີພຣະພາຄວ່າ:

ຂ້າແຕ່ພຣະອົງຄ໌ຜູ້ຈະເຣີນ! ພິກຂຸອົງຄ໌ໜຶ່ງໃນພຣະນະຄອຣສາວັຕຖີຖືກງູກັດ ທຳກາລະແລ້ວ.

ພຣະຜູ້ມີພຣະພາຄຕຣັສວ່າ:

ພິກຂຸທັງຫລາຍ! ພິກຂຸອົງຄ໌ນັ້ນບໍ່ໄດ້ແຜ່ເມຕຕາຈິຕໄປສູ່ຕະກຸນພະຍາງູທັງ ໔ ຢ່າງແນ່ນອນ ເພາະຖ້າພິກຂຸນັ້ນແຜ່ເມຕຕາຈິຕໄປສູ່ຕະກຸນພະຍາງູທັງ ໔ ພິກຂຸນັ້ນຈະບໍ່ຖືືກງູກັດຈົນມໍຣະນະພາບ ຕະກຸນພະຍາງູທັງ ໔ ເປັນຢ່າງໃດ? ຄື:

໑. ຕະກຸນພະຍາງູວິຣູປັກຂະ

໒. ຕະກຸນພະຍາງູເອຣາປະຖະ

໓. ຕະກຸນພະຍາງູສັພພະຍາປຸຕຕະ

໔. ຕະກຸນພະຍາງູກັນຫາໂຄຕະມະກະ

ພິກຂຸອົງຄ໌ນັ້ນບໍ່ໄດ້ແຜ່ເມຕຕາຈິຕໄປສູ່ຕະກຸນພະຍາງູທັງ ໔ ແນ່ນອນ ຖ້າພິກຂຸນັ້ນແຜ່ເມຕຕາຈິຕໄປສູ່ຕະກຸນພະຍາງູທັງ ໔ ພິກຂຸນັ້ນຈະບໍ່ຖືືກງູກັດຈົນມໍຣະນະພາບ.

ພິກຂຸທັງຫລາຍ! ເຮົາອະນຸຍາດໃຫ້ແຜ່ເມຕຕາຈິຕໄປສູ່ຕະກຸນພະຍາງູທັງ ໔ ນີ້ ເພື່ອຄຸ້ມຄອງຕົນ ເພື່ອຮັກສາຕົນ ເພື່ອປ້ອງກັນຕົນ ແລະຈົ່ງກະທຳກາຣແຜ່ຢ່າງນີ້ວ່າ:

ເຮົາກັບຕະກຸນພະຍາງູວິຣູປັກຂະ ຈົ່ງມີເມຕຕາຕໍ່ກັນ.

ເຮົາກັບຕະກຸນພະຍາງູເອຣາປະຖະ ຈົ່ງມີເມຕຕາຕໍ່ກັນ.

ເຮົາກັບຕະກຸນພະຍາງູສັພພະຍາປຸຕຕະຈົ່ງມີເມຕຕາຕໍ່ກັນ.

ເຮົາກັບຕະກຸນພະຍາງູກັນຫາໂຄຕະມະກະ ຈົ່ງມີເມຕຕາ ຕໍ່ກັນ.

ເຮົາກັບຝູງສັຕທີ່ບໍ່ມີຕີນ ຈົ່ງມີເມຕຕາຕໍ່ກັນ.

ເຮົາກັບຝູງສັຕ ໒ ຕີນ ຈົ່ງມີເມຕຕາຕໍ່ກັນ.

ເຮົາກັບຝູງສັຕ ໔ ຕີນ ຈົ່ງມີເມຕຕາຕໍ່ກັນ.

ເຮົາກັບຝູງສັຕທີ່ມີຫລາຍຕີນ ຈົ່ງມີເມຕຕາຕໍ່ກັນ.