ຄວາມສັນໂດດ

ສມັຍໜຶ່ງ ພຣະຜູ້ມີພຣະພາຄສະເດັຈຈາຣິກໄປໃນໂກສົລຊົນບົທພ້ອມດ້ວຍພິກຂຸສົງຄ໌ໝູ່ໃຫຍ່ ສະເດັຈເຖິງພຣາມມະນະຄາມແຫ່ງຊາວໂກສົລຊື່ ເວນາຄະປຸຣະ ພຣາມນ໌ແລະຄະຫະບໍດີຊາວເວນາຄະປຸຣະໄດ້ສະດັບຂ່າວວ່າ ພຣະສະມະນະໂຄຕະມະສາກະຍະບຸຕຊົງຜະນວຊຈາກສາກະຍະສະກຸລແລ້ວ ສະເດັຈມາເຖິງເວນາຄະປຸຣະໂດຍລຳດັບ ກໍກິຕຕິສັທອັນງາມ (ກັລຍາໂນ ກິຕຕິສັທໂທ) ຂອງທ່ານພຣະໂຄດົມພຣະອົງຄ໌ນັ້ນແລ ຂະຈອຣໄປແລ້ວຢ່າງນີ້ວ່າ ເພາະເຫຕຢ່າງນີ້ໆ ພຣະຜູ້ມີພຣະພາຄພຣະອົງຄ໌ນັ້ນ ເປັນພຣະອະຣະຫັນຕ໌, ຕຣັສຮູ້ເອງໂດຍຊອບ, ເຖິງພ້ອມດ້ວຍວິຊຊາແລະຈະຣະນະ, ສະເດັຈໄປດີແລ້ວ, ຊົງຮູ້ແຈ້ງໂລກ, ເປັນສາຣະຖີຝຶກບຸຣຸສທີ່ຄວນຝຶກບໍ່ມີຜູ້ອື່ນຍິ່ງກວ່າ, ເປັນສາສດາຂອງເທວະດາແລະມະນຸສທັງຫລາຍ, ເປັນຜູ້ເບີກບານແລ້ວ, ເປັນຜູ້ຈຳແນກທັມ. ພຣະອົງຄ໌ຊົງກະທຳໂລກນີ້ ພ້ອມທັງເທວະໂລກ ມາຣະໂລກ ພຣົມມະໂລກ ໃຫ້ແຈ້ງຊັດດ້ວຍພຣະປັນຍາອັນຍິ່ງຂອງພຣະອົງຄ໌ເອງ ແລ້ວຊົງສອນໝູ່ສັຕພ້ອມທັງສະມະນະພຣາມນ໌ ເທວະດາແລະມະນຸສໃຫ້ຮູ້ຕາມ. ພຣະອົງຄ໌ຊົງສະແດງທັມງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ຊົງປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງ ກໍກາຣໄດ້ເຫັນພຣະອະຣະຫັນຕ໌ທັງຫລາຍເຫັນປານນີ້ ເປັນຄວາມດີແລ.

ຄັ້ງນັ້ນແລ ພຣາມນ໌ແລະຄະຫະບໍດີຊາວເວນາຄະປຸຣະໄດ້ເຂົ້າໄປເຝົ້າພຣະຜູ້ມີພຣະພາຄເຖິງທີ່ປະທັບ ບາງພວກອະພິວາທ ພຣະຜູ້ມີພຣະພາຄແລ້ວ ນັ່ງໃນທີ່ຄວນສ່ວນຂ້າງໜຶ່ງ ບາງພວກໄດ້ປຣາສັຍກັບພຣະຜູ້ມີພຣະພາຄ ພໍຜ່ານກາຣປຣາສັຍພໍໃຫ້ ຣະນຶກເຖິງກັນໄປແລ້ວ ກໍນັ່ງໃນທີ່ຄວນສ່ວນຂ້າງໜຶ່ງ ບາງພວກປະນົມມືໄຫວ້ໄປທາງພຣະຜູ້ມີພຣະພາຄແລ້ວນັ່ງໃນທີ່ຄວນສ່ວນຂ້າງໜຶ່ງ ບາງພວກປະກາສຊື່ແລະໂຄຕແລ້ວນັ່ງໃນທີ່ຄວນສ່ວນຂ້າງໜຶ່ງ ບາງພວກນັ່ງນິ້ງຢູ່ໃນທີ່ຄວນສ່ວນຂ້າງໜຶ່ງ ຄັນແລ້ວ ພຣາມນ໌ວັຈສະໂຄຕຊາວເວນາຄະປຸຣະໄດ້ກຣາບທູລພຣະຜູ້ມີພຣະພາຄວ່າ:

ຂ້າແຕ່ພຣະໂຄດົມຜູ້ຈະເຣີນ! ໜ້າອັສສະຈັນຍ໌

ຂ້າແຕ່ພຣະໂຄດົມຜູ້ຈະເຣີນ! ບໍ່ເຄີຍມີມາແລ້ວ ອິນຊີຂອງທ່ານພຣະໂຄດົມຜ່ອງໃສຢ່າງຍິ່ງ ພຣະສະວີວັນຂອງທ່ານພຣະໂຄດົມບໍຣິສຸທຜຸດຜ່ອງ ເໝືອນກັບຜົລພຸທທາສຸກທີ່ມີໃນສະຣະທະສມັຍອັນເປັນຂອງບໍຣິສຸທຜຸດຜ່ອງ ສັນນັ້ນ.

ຂ້າແຕ່ພຣະໂຄດົມຜູ້ຈະເຣີນ! ອິນຊີຂອງທ່ານພຣະໂຄດົມຜ່ອງໃສ ພຣະສະວີວັນຂອງທ່ານພຣະໂຄດົມບໍຣິສຸທຜຸດຜ່ອງ ເໝືອນກັບໝາກຕານສຸກທີ່ຫລຸດຈາກຂົ້ວອັນເປັນຂອງບໍຣິສຸທຜຸດຜ່ອງ ສັນນັ້ນ.

ຂ້າແຕ່ພຣະໂຄດົມຜູ້ຈະເຣີນ! ອິນຊີຂອງທ່ານພຣະໂຄດົມຜ່ອງໃສ ພຣະສະວີວັນຂອງທ່ານພຣະໂຄດົມບໍຣິສຸທຜຸດຜ່ອງ ເໝືອນກັບແທ່ງຄຳຊົມພູນຸຊທີ່ບຸຕນາຍຊ່າງຄຳຜູ້ຂະຫຍັນຫລອມດີແລ້ວ ອັນນາຍຊ່າງຄຳຜູ້ສລາດເຈຍຣະໄນດີແລ້ວ ວາງໄວ້ເທິງຜ້າກັມພົລເຫລືອງ ສ່ອງແສງປະກາຍແວວວາວ ສັນນັ້ນ.

ຂ້າແຕ່ພຣະໂຄດົມຜູ້ຈະເຣີນ! ທີ່ນັ່ງທີ່ນອນອັນສູງໃຫຍ່ເຫັນປານນີ້ຄື ຕຽງມີເທົ້າເກີນປະມານ ຕຽງມີເທົ້າເຮັດເປັນຮູບສັຕຮ້າຍ ຜ້າໂກເຊົາວ໌ຂົນຍາວ ເຄື່ອງລາດທີ່ເຮັດດ້ວຍຂົນແກະວິຈິຕດ້ວຍລວດລາຍ ເຄື່ອງລາດທີ່ເຮັດດ້ວຍຂົນແກະສີຂາວ ເຄື່ອງລາດທີ່ມີສັນຖານເປັນຊໍ່ດອກໄມ້ ເຄື່ອງລາດທີ່ຍັດນຸ່ນ ເຄື່ອງລາດຂົນແກະອັນວິຈິຕດ້ວຍຮູບສັຕຮ້າຍ ມີສີຫະແລະເສືອເປັນຕົ້ນ ເຄື່ອງລາດຂົນແກະມີຂົນຕັ້ງ ເຄື່ອງລາດມີຂົນແກະຂ້າງດຽວ ເຄື່ອງລາດຄຳແລະເງິນແກມໄໝ ເຄື່ອງລາດໄໝກີບຄຳແລະເງິນ ເຄື່ອງລາດຂົນແກະບັນຈຸນາງຟ້ອນ ໑໖ ຄົນຢືນລຳໄດ້ ເຄື່ອງລາດຫລັງຊ້າງ ເຄື່ອງລາດຫລັງມ້າ ເຄື່ອງລາດໃນຣົຖ ເຄື່ອງລາດທີ່ເຮັດດ້ວຍໜັງສັຕຊື່ອະຊີນະອັນມີຂົນອ່ອນນຸ່ມ ເຄື່ອງລາດຢ່າງດີເຮັດດ້ວຍໜັງເຫັນ ເຄື່ອງລາດມີແພດານ ເຄື່ອງລາດມີໝອນຂ້າງ ທ່ານພຣະໂຄດົມໄດ້ທີ່ນັ່ງທີ່ນອນເຫັນປານນີ້ຕາມຄວາມປາຖນາ ໄດ້ໂດຍບໍ່ຍາກ ໂດຍບໍ່ລຳບາກແນ່ນອນ.

ພຣະຜູ້ມີພຣະພາຄຕຣັສຕອບວ່າ: