ອະບາຍມຸຂ

ພິກຂຸທັງຫລາຍ! ໂທສໃນບຸຄຄົລຜູ້ປຽບດ້ວຍປ່າຊ້າ ໕ ປະກາຣນີ້ ສັນນັ້ນເໝືອນກັນ; ໕ ປະກາຣເປັນຢ່າງໃດ?

ພິກຂຸທັງຫລາຍ! ບຸຄຄົລບາງຄົນໃນກໍຣະນີນີ້ ຍ່ອມປະກອບດ້ວຍກາຍກັມທີ່ບໍ່ສະອາດ, ປະກອບດ້ວຍວະຈີກັມທີ່ບໍ່ສະອາດ, ປະກອບດ້ວຍມະໂນກັມທີ່ບໍ່ສະອາດ ເຮົາກ່າວຂໍ້ນີ້ເພາະເຂົາເປັນຜູ້ບໍ່ສະອາດ ປ່າຊ້ານັ້ນເປັນບ່ອນທີ່ບໍ່ສະອາດ ສັນໃດ; ເຮົາກ່າວບຸຄຄົລນີ້ປຽບສັນນັ້ນ.

ກິຕຕິສັບອັນຕ່ຳຊາມຂອງເຂົາຜູ້ປະກອບດ້ວຍກາຍກັມທີ່ບໍ່ສະອາດ, ປະກອບດ້ວຍວະຈີກັມທີ່ບໍ່ສະອາດ, ປະກອບດ້ວຍມະໂນກັມທີ່ບໍ່ສະອາດຍ່ອມຟຸ້ງໄປ ເຮົາກ່າວຂໍ້ນີ້ເພາະເຂົາເປັນຜູ້ມີກິ່ນເໝັນ ປ່າຊ້າມີກິ່ນເໝັນ ສັນໃດ; ເຮົາກ່າວບຸຄຄົລນີ້ປຽບສັນນັ້ນ.

ເພື່ອນພຣົມມະຈັນຍ໌ຜູ້ມີສີລເປັນທີ່ຮັກຍ່ອມເວັ້ນໄກຈາກບຸຄຄົລນັ້ນຜູ້ປະກອບດ້ວຍກາຍກັມທີ່ບໍ່ສະອາດ, ປະກອບດ້ວຍວະຈີກັມທີ່ບໍ່ສະອາດ, ປະກອບດ້ວຍມະໂນກັມທີ່ບໍ່ສະອາດ ເຮົາກ່າວຂໍ້ນີ້ເພາະເຂົາມີພັຍສະເພາະໜ້າ ປ່າຊ້າມີພັຍສະເພາະໜ້າ ສັນໃດ; ເຮົາກ່າວບຸຄຄົລນີ້ປຽບສັນນັ້ນ.

ເຂົາປະກອບດ້ວຍກາຍກັມທີ່ບໍ່ສະອາດ, ປະກອບດ້ວຍວະຈີກັມທີ່ບໍ່ສະອາດ, ປະກອບດ້ວຍມະໂນກັມທີ່ບໍ່ສະອາດ ຍ່ອມຢູ່ຮ່ວມກັບບຸຄຄົລຜູ້ສະເໝີກັນ ເຮົາກ່າວຂໍ້ນີ້ເພາະເຂົາເປັນທີ່ຢູ່ຂອງສິ່ງຮ້າຍ ປ່າຊ້າເປັນທີ່ຢູ່ຂອງອະມະນຸສຮ້າຍ ສັນໃດ; ເຮົາກ່າວບຸຄຄົລນີ້ປຽບສັນນັ້ນ.

ເພື່ອນພຣົມມະຈັນຍ໌ຜູ້ມີສີລເປັນທີ່ຮັກ ເຫັນເຂົາຜູ້ປະກອບດ້ວຍກາຍກັມທີ່ບໍ່ສະອາດ, ປະກອບດ້ວຍວະຈີກັມທີ່ບໍ່ສະອາດ, ປະກອບດ້ວຍມະໂນກັມທີ່ບໍ່ສະອາດແລ້ວ ຍ່ອມຣຳພັນທຸກຂ໌ວ່າ ໂອ! ເປັນທຸກຂ໌ຂອງພວກເຮົາທີ່ຢູ່ຮ່ວມກັບບຸຄຄົລເຫັນປານນີ້ ເຮົາກ່າວຂໍ້ນີ້ເພາະເຂົາເປັນທີ່ຣຳພັນທຸກຂ໌ ປ່າຊ້າເປັນບ່ອນຣຳພັນທຸກຂ໌ຂອງຊົນທັງຫລາຍ ສັນໃດ; ເຮົາກ່າວບຸຄຄົລນີ້ປຽບສັນນັ້ນ.

ພິກຂຸທັງຫລາຍ! ໂທສໃນບຸຄຄົລຜູ້ປຽບດ້ວຍປ່າຊ້າ ໕ ປະກາຣນີ້ແລ.

ອັງຄຸຕຕະຣະນິກາຍ ປັນຈະກະ-ສັກກະນິບາຕ ໒໒/໒໔໗/໒໔໙

ມິຕທຽມ ໔ ຈໍາພວກ

ຄະຫະບໍດີບຸຕ! ຄົນ ໔ ຈຳພວກເຫລົ່ານີ້ຄື:

ຄົນນຳແຕ່ສິ່ງຂອງໆເພື່ອນໄປທ່າດຽວ,

ຄົນດີແຕ່ເວົ້າ,

ຄົນປະຈົບສໍພໍ,

ຄົນຊັກຊວນໃນທາງຈິບຫາຍ,

ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ.

ຄະຫະບໍດີບຸຕ! ຄົນນໍາແຕ່ສິ່ງຂອງໆເພື່ອນໄປທ່າດຽວ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະຄື:

ເປັນຄົນຄິດເອົາແຕ່ໄດ້ຝ່າຍດຽວ,

ຍອມເສຍໜ້ອຍ ແຕ່ຫວັງຢາກໄດ້ຫລາຍ,

ບໍ່ຮັບກະທຳກິຈຂອງເພື່ອນໃນຄາວມີພັຍ,

ຄົບເພື່ອນເພາະເຫັນແກ່ປະໂຍຊນ໌ຂອງຕົນ,

ຄະຫະບໍດີບຸຕ! ຄົນນຳແຕ່ສິ່ງຂອງໆເພື່ອນໄປທ່າດຽວ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະເຫລົ່ານີ້ແລ.

ຄະຫະບໍດີບຸຕ! ຄົນດີແຕ່ເວົ້າ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະຄື:

ເກັບເອົາຂອງທີ່ລ່ວງໄປແລ້ວມາປຣາສັຍ,

ອ້າງເອົາຂອງທີ່ຍັງມາບໍ່ເຖິງມາປຣາສັຍ,

ສົງເຄາະດ້ວຍສິ່ງທີ່ຫາປະໂຍຊນ໌ບໍ່ໄດ້,

ເມື່ອມີກິຈທຸຣະກໍສະແດງຄວາມຂັດຂ້ອງ,

ຄະຫະບໍດີບຸຕ! ຄົນດີແຕ່ເວົ້າ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະເຫລົ່ານີ້ແລ.

ຄະຫະບໍດີບຸຕ! ຄົນປະຈົບສໍພໍ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະຄື:

ຕາມໃຈເພື່ອນທີ່ກະທຳຄວາມຊົ່ວ,

ຕາມໃຈເພື່ອນທີ່ກະທຳຄວາມດີ,

ຕໍ່ໜ້າສັນລະເສີນ,

ລັບຫລັງນິນທາ.

ຄະຫະບໍດີບຸຕ! ຄົນປະຈົບສໍພໍ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະເຫລົ່ານີ້ແລ.

ຄະຫະບໍດີບຸຕ! ຄົນທີ່ຊັກຊວນໃນທາງຈິບຫາຍ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະຄື:

ຊັກຊວນໃຫ້ເສພສຸຣາເມຣັຍແລະສິ່ງມຶນເມົາ ອັນເປັນທີ່ຕັ້ງແຫ່ງຄວາມປະມາທ,

ຊັກຊວນໃຫ້ທ່ຽວຕາມສະຖານທີ່ຕ່າງໆໃນເວລາວິກາລ,

ຊັກຊວນໃຫ້ທ່ຽວເບິ່ງກາຣຫລິ້ນມະຫໍຣະສົພຕ່າງໆ,

ຊັກຊວນໃຫ້ຫລິ້ນກາຣພະນັນ ອັນເປັນທີ່ຕັ້ງແຫ່ງຄວາມປະມາທ.

ຄະຫະບໍດີບຸຕ! ຄົນທີ່ຊັກຊວນໃນທາງຈິບຫາຍ ທ່ານຈົ່ງຮູ້ວ່າ ບໍ່ແມ່ນມິຕ ເປັນແຕ່ຄົນທຽມມິຕ ໂດຍມີ ໔ ສະຖານະເຫລົ່ານີ້ແລ.