ຄວາມສັນໂດດ

ພິກຂຸທັງຫລາຍ! ກາຣກະທໍາຂອງໂມຄະບຸຣຸສເຫລົ່ານັ້ນ ບໍ່ເປັນໄປເພື່ອຄວາມເຫລື້ອມໃສຂອງຊົນທີ່ຍັງບໍ່ເຫລື້ອມໃສ ຫລືເພື່ອຄວາມເຫລື້ອມໃສຢ່າງຍິ່ງຂອງຊົນທີ່ເຫລື້ອມໃສແລ້ວ ໂດຍແທ້ແລ້ວ ກາຣກະທຳຂອງພວກເຂົານັ້ນ ຍ່ອມເປັນໄປເພື່ອຄວາມບໍ່ເຫລື້ອມໃສຂອງຊົນທີ່ຍັງບໍ່ເຫລື້ອມໃສ ແລະເພື່ອຄວາມເປັນຢ່າງອື່ນຂອງຊົນບາງພວກທີ່ເຫລື້ອມໃສແລ້ວ... ຄັນແລ້ວຊົງສະແດງທັມມິກະຖາ ຊົງຕຣັສກັບພິກຂຸທັງຫລາຍວ່າ:

ພິກຂຸທັງຫລາຍ! ເຮົາອະນຸຍາດກາຣກຣາບໄຫວ້ ກາຣລຸກຮັບ ກາຣກະທໍາອັນຊະລີ ກາຣກະທໍາສາມີຈິກັມ ອາສະນະອັນເລີດ ນໍ້າອັນເລີດ ບິນທະບາຕອັນເລີດ ຕາມລໍາດັບຜູ້ແກ່ກວ່າ [ຕາມລຳດັບພັນສາ]

ອີກຢ່າງໜຶ່ງ ພິກຂຸທັງຫລາຍບໍ່ຄວນກີດກັ້ນເສນາສະນະຂອງສົງຄ໌ຕາມລຳດັບພັນສາ ອົງຄ໌ໃດກີດກັ້ນຕ້ອງອາບັຕທຸກກົຕ [ພິກຂະເວ ສັງຄິກັງ ຍະຖາວຸທທັງ ປະຕິພາຫິຕັພພັງ ໂຍ ປະຕິພາເຫີຍຍະ ອາປັຕຕິ ທຸກກະຕັສສາຕິ ຯ].

ວິນັຍປິດົກ ຈຸລວັຄ ພາຄ ໒ ເຫລັ້ມທີ ໗/໗໒-໗໕/໒໖໐-໒໖໓

ພັຍໃນອະນາຄົຕ ໕ ປະກາຣ

ພິກຂຸທັງຫລາຍ! ພັຍໃນອະນາຄົຕ ໕ ປະກາຣນີ້ ເຊິ່ງຍັງບໍ່ ເກີດຂຶ້ນໃນບັດນີ້ ແຕ່ຈັກເກີດຂຶ້ນໃນກາລຕໍ່ໄປ ພັຍເຫລົ່ານັ້ນອັນພວກເຈົ້າທັງຫລາຍຄວນຮູ້ໄວ້ສະເພາະ ຄັນແລ້ວຄວນພະຍາຍາມເພື່ອລະພັຍເຫລົ່ານັ້ນ, ໕ ປະກາຣເປັນຢ່າງໃດ?

ພິກຂຸທັງຫລາຍ! ໃນອະນາຄົຕ ພິກຂຸທັງຫລາຍຈັກເປັນຜູ້ຊອບຈີວອຣດີງາມ ເມື່ອຊອບຈີວອຣດີງາມ ກໍຈັກລະຄວາມເປັນຜູ້ຖືຜ້າບັງສຸກຸລເປັນວັຕ ຈັກລະເສນາສະນະອັນສງັດຄືປ່າແລະປ່າດົງໜາ ຈັກປະຊຸມກັນຢູ່ທີ່ບ້ານ ນິຄົມ ແລະຣາຊະທານີ ແລະຈັກເຖິງກາຣສະແຫວງຫາອັນບໍ່ສົມຄວນ ບໍ່ເໝາະສົມຕ່າງໆ ເພາະເຫຕແຫ່ງຈີວອຣ. ພິກຂຸທັງຫລາຍ ພັຍໃນອະນາຄົຕຂໍ້ທີ ໑ ນີ້ ເຊິ່ງຍັງບໍ່ເກີດຂຶ້ນໃນບັດນີ້ ແຕ່ຈັກເກີດຂຶ້ນໃນກາລຕໍ່ໄປ ພັຍນັ້ນອັນພວກເຈົ້າທັງຫລາຍຄວນຮູ້ໄວ້ສະເພາະ ຄັນແລ້ວຄວນພະຍາຍາມເພື່ອລະພັຍນັ້ນ.

ພິກຂຸທັງຫລາຍ! ອີກປະກາຣໜຶ່ງ ໃນອະນາຄົຕ ພິກຂຸທັງຫລາຍຈັກເປັນຜູ້ຊອບບິນທະບາຕດີງາມ ເມື່ອຊອບບິນທະບາຕດີງາມ ກໍຈັກລະຄວາມເປັນຜູ້ຖືກາຣທ່ຽວບິນທະບາຕເປັນວັຕ ຈັກລະເສນາສະນະອັນສງັດຄືປ່າແລະປ່າດົງໜາ ຈັກປະຊຸມກັນຢູ່ທີ່ບ້ານ ນິຄົມ ແລະຣາຊະທານີ ສະແຫວງຫາບິນທະບາຕທີ່ມີຣົສອັນເລີດດ້ວຍປາຍລີ້ນ ແລະຈັກເຖິງກາຣສະແຫວງຫາອັນບໍ່ສົມຄວນ ບໍ່ເໝາະສົມຕ່າງໆ ເພາະເຫຕແຫ່ງບິນທະບາຕ. ພິກຂຸທັງຫລາຍ ພັຍໃນອະນາຄົຕຂໍ້ທີ ໒ ນີ້ ເຊິ່ງຍັງບໍ່ເກີດຂຶ້ນໃນບັດນີ້ ແຕ່ຈັກເກີດຂຶ້ນໃນກາລຕໍ່ໄປ ພັຍນັ້ນອັນພວກເຈົ້າທັງຫລາຍຄວນຮູ້ໄວ້ສະເພາະ ຄັນແລ້ວຄວນພະຍາຍາມເພື່ອລະພັຍນັ້ນ.

ພິກຂຸທັງຫລາຍ! ອີກປະກາຣໜຶ່ງ ໃນອະນາຄົຕ ພິກຂຸທັງຫລາຍຈັກເປັນຜູ້ຊອບເສນາສະນະດີງາມ ເມື່ອຊອບເສນາສະນະດີງາມ ກໍຈັກລະຄວາມເປັນຜູ້ຖືກາຣຢູ່ປ່າເປັນວັຕ ຈັກລະເສນາສະນະອັນສງັດຄືປ່າແລະປ່າດົງໜາ ຈັກປະຊຸມກັນຢູ່ທີ່ບ້ານ ນິຄົມ ແລະຣາຊະທານີ ແລະຈັກເຖິງກາຣສະແຫວງຫາອັນບໍ່ສົມຄວນ ບໍ່ເໝາະສົມຕ່າງໆ ເພາະເຫຕແຫ່ງເສນາສະນະ. ພິກຂຸທັງຫລາຍ ພັຍໃນອະນາຄົຕຂໍ້ທີ ໓ ນີ້ ເຊິ່ງຍັງບໍ່ເກີດຂຶ້ນໃນບັດນີ້ ແຕ່ຈັກເກີດຂຶ້ນໃນກາລຕໍ່ໄປ ພັຍນັ້ນອັນພວກເຈົ້າທັງຫລາຍຄວນຮູ້ໄວ້ສະເພາະ ຄັນແລ້ວຄວນພະຍາຍາມເພື່ອລະພັຍນັ້ນ.

ພິກຂຸທັງຫລາຍ! ອີກປະກາຣໜຶ່ງ ໃນອະນາຄົຕ ພິກຂຸທັງຫລາຍຈັກເປັນຜູ້ຢູ່ຄຸກຄີດ້ວຍພິກຂຸນີ ສິກຂະມານາ ແລະສະມະນຸທເທສ ເມື່ອມີກາຣຢູ່ຄຸກຄີດ້ວຍພິກຂຸນີ ສິກຂະມານາ ແລະສະມະນຸທເທສ ຍ່ອມຫວັງຂໍ້ນີ້ໄດ້ວ່າ ເຂົາເຫລົ່ານັ້ນຈັກເປັນຜູ້ບໍ່ຍິນດີປະພຶຕພຣົມມະຈັນຍ໌ ຈັກຕ້ອງອາບັຕອັນເສົ້າ ໝອງບາງຢ່າງ ຫລືຈັກບອກຄືນສິກຂາວຽນມາເພື່ອຄວາມເປັນຄະຣືຫັສຖ໌. ພິກຂຸທັງຫລາຍ ພັຍໃນອະນາຄົຕຂໍ້ທີ ໔ ນີ້ ເຊິ່ງຍັງບໍ່ເກີດຂຶ້ນໃນບັດນີ້ ແຕ່ຈັກເກີດຂຶ້ນໃນກາລຕໍ່ໄປ ພັຍນັ້ນອັນພວກເຈົ້າທັງຫລາຍຄວນຮູ້ໄວ້ສະເພາະ ຄັນແລ້ວຄວນພະຍາຍາມເພື່ອລະພັຍນັ້ນ.