ພົບພູມ

ວັຈສະ ! ສະໄໝໃດ ແປວໄຟ ຖືກລົມພັດຫຼຸດປິວໄປໄກ ເຮົາຍ່ອມບັນຍັດແປວໄຟນັ້ນວ່າ ມີລົມນັ້ນແຫຼະເປັນເຊື້ອ ເພາະວ່າ ສະໄໝນັ້ນ ລົມຍ່ອມເປັນເຊື້ອໄຟຂອງແປວໄຟນັ້ນ.

ວັຈສະ ! ສະໄໝໃດ ສັຕປະຖິ້ມກາຍນີ້ ແລະຍັງບໍ່ບັງເກີດດ້ວຍກາຍອື່ນ ເຮົາກ່າວສັຕນີ້ວ່າ ມີຕັນຫານັ້ນແຫຼະເປັນເຊື້ອ ເພາະວ່າ ສະໄໝນັ້ນ ຕັນຫາຍ່ອມເປັນເຊື້ອຂອງສັຕນັ້ນ.

ພິກຂຸທັງຫຼາຍ ! ປຽບເໝືອນທ່ອນໄມ້ ອັນບຸກຄົນດຶກຂຶ້ນໄປເທິງອາກາດ ບາງເທື່ອຕົກເອົາທາງກົກລົງ ບາງເທື່ອຕົກເອົາກາງລົງ ບາງເທື່ອຕົກເອົາທາງປາຍລົງ ຂໍ້ນີ້ເຊັ່ນໃດ.

ພິກຂຸທັງຫຼາຍ ! ສັຕທັງຫຼາຍ ຜູ້ມີອະວິຊຊາເປັນເຄື່ອງກັ້ນ ມີຕັນຫາເປັນເຄື່ອງຜູກ ທ່ອງທ່ຽວໄປມາຢູ່ ກໍເຊັ່ນນັ້ນເໝືອນກັນ ບາງເທື່ອແລ່ນໄປຈາກໂລກນີ້ສູ່ໂລກອື່ນ ບາງເທື່ອແລ່ນຈາກໂລກອື່ນມາສູ່ໂລກນີ້.

- ບາລີ ຂັນທ. ສັງ. ໑໗/໒໓໒/໓໖໗. - ບາລີ ສລາ. ສັງ. ໑໘/໔໘໕/໘໐໐.

- ບາລີ ນິທານ. ສັງ. ໑໖/໒໑໙/໔໓໘-໔໓໙.

ພິກຂຸທັງຫຼາຍ ! ພົບທັງຫຼາຍ ໓ ຢ່າງເຫຼົ່ານີ້ມີຢູ່ ຄື

ກາມະພົບ ຮູບພົບ ອະຮູບພົບ.

ພິກຂຸທັງຫຼາຍ ! ນີ້ເອີ້ນວ່າ ພົບ.

ຄວາມມີຂຶ້ນພ້ອມແຫ່ງພົບ ຍ່ອມມີ

ເພາະຄວາມກໍ່ຂຶ້ນພ້ອມແຫ່ງອຸປາທານ

ຄວາມດັບບໍ່ເຫຼືອແຫ່ງພົບ ຍ່ອມມີ

ເພາະຄວາມດັບບໍ່ເຫຼືອແຫ່ງອຸປາທານ

ມັກຄະອັນປະກອບດ້ວຍອົງແປດ ອັນປະເສີດນັ້ນເອງ

ເປັນປະຕິປະທາໃຫ້ເຖິງຄວາມດັບບໍ່ເຫຼືອແຫ່ງພົບ ໄດ້ແກ່ສິ່ງເຫຼົ່ານີ້ຄື

ຄວາມເຫັນຖືກຕ້ອງ ຄວາມດໍາຣິຖືກຕ້ອງ

ການເວົ້າຈາຖືກຕ້ອງ ການເຮັດການງານຖືກຕ້ອງ

ການລ້ຽງຊີບຖືກຕ້ອງ ຄວາມພາກພຽນຖືກຕ້ອງ

ຄວາມລະນຶກຖືກຕ້ອງ ຄວາມຕັ້ງໃຈໝັ້ນຖືກຕ້ອງ.

ພິກຂຸທັງຫຼາຍ ! ເພາະບໍ່ຮູ້ເຖິງ ບໍ່ແທງຕະຫຼອດຊຶ່ງອະຣິຍະສັຈສີ່ຢ່າງ

ເຮົາແລະພວກເຈົ້າທັງຫຼາຍ

ຈຶ່ງໄດ້ທ່ອງທ່ຽວໄປແລ້ວໃນສັງສາຣະວັຕ

ຕະຫຼອດກາລຍືດຍາວດົນນານເຖິງປານນີ້.

ພິກຂຸທັງຫຼາຍ ! ອະຣິຍະສັຈສີ່ຢ່າງ ເຫຼົ່າໃດໜໍ ?

ພິກຂຸທັງຫຼາຍ ! ເພາະບໍ່ຮູ້ເຖິງ ບໍ່ແທງຕະຫຼອດ

ຊຶ່ງອະຣິຍະສັຈຄື ທຸກຂ໌

ຊຶ່ງອະຣິຍະສັຈຄື ເຫດໃຫ້ເກີດທຸກຂ໌

ຊຶ່ງອະຣິຍະສັຈຄື ຄວາມດັບບໍ່ເຫຼືອຂອງທຸກຂ໌

ຊຶ່ງອະຣິຍະສັຈຄືທາງດໍາເນີນໃຫ້ເຖິງຄວາມດັບບໍ່ເຫຼືອຂອງທຸກຂ໌.

- ບາລີ ນິທານ. ສັງ. ໑໖/໕໑/໙໑.

- ບາລີ ມຫາວາຣ. ສັງ. ໑໙/໕໔໑/໑໖໙໘.