ປຽບເໝືອນກະສອບໜັງແມວ

ພິກຂຸທັງຫລາຍ! ປຽບເໝືອນກະສອບໜັງແມວທີ່ນາຍຊ່າງໜັງຟອກຮຽບຮ້ອຍແລ້ວ ອ່ອນນຸ້ມດັ່ງປຸຍນຸ່ນແລະສຳລີ ເປັນກະສອບທີ່ຕີໄດ້ບໍ່ດັງກ້ອງ ຖ້າມີບຸຣຸສຖືເອົາໄມ້ຫລືກະເບຶື້ອງມາ ເວົ້າຂຶ້ນຢ່າງນີ້ວ່າ ເຮົາຈັກກະທຳກະສອບໜັງແມວທີ່ເຂົາຟອກໄວ້ຮຽບຮ້ອຍແລ້ວ ອ່ອນນຸ້ມດັ່ງປຸຍນຸ່ນ ແລະສຳລີທີ່ຕີໄດ້ບໍ່ດັງກ້ອງນີ້ໃຫ້ເປັນຂອງມີສຽງດັງກ້ອງດ້ວຍໄມ້ຫລືກະເບື້ອງ ດັ່ງນີ້.

ພິກຂຸທັງຫລາຍ! ພວກເຈົ້າທັງຫລາຍຈະສຳຄັນຄວາມຂໍ້ນັ້ນວ່າຢ່າງໃດ ບຸຣຸສນັ້ນຈະກະທຳກະສອບໜັງແມວທີ່ເຂົາຟອກໄວ້ຮຽບຮ້ອຍແລ້ວ ອ່ອນນຸ້ມດັ່ງປຸຍນຸ່ນແລະສຳລີທີ່ຕີໄດ້ບໍ່ດັງກ້ອງນີ້ໃຫ້ເປັນຂອງມີສຽງດັງກ້ອງດ້ວຍໄມ້ຫລືກະເບື້ອງໄດ້ຫລືບໍ່?

ບໍ່ໄດ້ເລີຍ ພຣະອົງຄ໌ຜູ້ຈະເຣີນ!

ຂໍ້ນັ້ນເພາະເຫຕໃດ?

ເພາະເຫຕວ່າ ກະສອບໜັງແມວນີ້ເຂົາຟອກຮຽບຮ້ອຍແລ້ວ ອ່ອນນຸ້ມດັ່ງປຸຍນຸ່ນແລະສຳລີທີ່ຕີໄດ້ບໍ່ດັງກ້ອງ ເຂົາຈະກະທຳກະສອບໜັງແມວນັ້ນໃຫ້ກັບເປັນຂອງມີສຽງດັງກ້ອງຂຶ້ນດ້ວຍໄມ້ຫລືກະເບື້ອງບໍ່ໄດ້ງ່າຍເລີຍ ບຸຣຸສນັ້ນຈະຕ້ອງອິດເມື່ອຍລຳບາກເປົ່າຢ່າງແນ່ນອນ ນີ້ສັນໃດ;

ພິກຂຸທັງຫລາຍ! ທາງແຫ່ງຖ້ອຍຄຳທີ່ບຸຄຄົລອື່ນຈະກ່າວກັບເຈົ້າມີຢູ່ ໕ ປະກາຣຄື:
ກາຣກ່າວໂດຍກາລອັນສົມຄວນຫລືບໍ່ສົມຄວນ ໑
ກ່າວດ້ວຍເຣື່ອງຈິງຫລືເຣື່ອງບໍ່ຈິງ ໑
ກ່າວດ້ວຍຄຳອ່ອນຫວານຫລືຄຳຫຍາບຄາຍ ໑
ກ່າວດ້ວຍຄຳທີ່ປະກອບດ້ວຍປະໂຍຊນ໌
ຫລືບໍ່ປະກອບດ້ວຍປະໂຍຊນ໌ ໑
ມີຈິຕເມຕຕາຫລືມີໂທສະໃນພາຍໃນກ່າວ ໑
ພິກຂຸທັງຫລາຍ! ເມື່ອບຸຄຄົລອື່ນຈະກ່າວໂດຍກາລອັນສົມຄວນຫລືບໍ່ສົມຄວນກໍຕາມ, ຈະກ່າວດ້ວຍເຣື່ອງຈິງຫລືເຣື່ອງບໍ່ຈິງກໍຕາມ, ຈະກ່າວດ້ວຍຖ້ອຍຄໍາອ່ອນຫວານຫລືຄຳຫຍາບຄາຍກໍຕາມ, ຈະກ່າວດ້ວຍຖ້ອຍຄໍາທີ່ປະກອບດ້ວຍປະໂຍຊນ໌ ຫລືບໍ່ປະກອບດ້ວຍປະໂຍຊນ໌ກໍຕາມ, ຈະມີຈິຕເມຕຕາ ຫລືມີໂທສະໃນພາຍໃນກ່າວກໍຕາມ;

ພິກຂຸທັງຫລາຍ! ໃນຂໍ້ນັ້ນ ພວກເຈົ້າທັງຫລາຍຄວນສຶກສາຢ່າງນີ້ວ່າ ຈິຕຂອງເຮົາຈັກບໍ່ປັ່ນປ່ວນ ເຮົາຈັກບໍ່ກ່າວວາຈາອັນຊົ່ວຫຍາບ ເຮົາຈັກອະນຸເຄາະດ້ວຍສິ່ງອັນເປັນປະໂຍຊນ໌ ເຮົາຈັກມີເມຕຕາ ບໍ່ມີໂທສະໃນພາຍໃນ ເຮົາຈັກແຜ່ເມຕຕາໄປເຖິງບຸຄຄົລນັ້ນ ແລະເຮົາຈັກແຜ່ເມຕຕາຈິຕອັນໄພບູນ ຍິ່ງໃຫຍ່ ຫາປະມານບໍ່ໄດ້ ບໍ່ມີເວຣ ບໍ່ມີພະຍາບາທ ໄປຕະຫລອດໂລກທັງປວງ ເຊິ່ງເປັນອາຣົມນ໌ຂອງຈິຕນັ້ນ ດັ່ງນີ້.

ພິກຂຸທັງຫລາຍ! ພວກເຈົ້າທັງຫລາຍຄວນສຶກສາດ້ວຍອາກາຣດັ່ງທີ່ກ່າວມານີ້ແລ.


ມັຊຊິມະນິກາຍ ມູລປັນນາສກ໌ ໑໒/໒໗໘-໒໗໙/໒໗໑