ເຂົ້າໄປຫາຄວາມຕາຍເພາະກາມ

ເຊົ້າມື້ໜຶ່ງ ພຣະຜູ້ມີພຣະພາຄເຈົ້າໄດ້ນຸ່ງຫົ່ມຈີວອນ ຖືບາຕເຂົ້າໄປບິນທະບາຕໃນເມືອງສາວັຕຖີ, ພຣະພຸດທະອົງຄ໌ ໄດ້ຊົງເຫັນໝູ່ມະນຸສສ໌ໃນເມືອງສາວັຕຖີເຫຼົ່ານັ້ນ ຊຶ່ງກໍາລັງຂ້ອງກ່ຽວ ຕິດພັນຢູ່ກັບກາມ ກໍາໜັດໃນກາມ ໝົກໝຸ້ນຢູ່ໃນກາມ ເປັນຢູ່ໂດຍສ່ວນຫຼາຍ, ຈຶ່ງຊົງເປັ່ງພຣະອຸທານນີ້ວ່າ :-

“ສັຕທັງຫຼາຍ ຜູ້ມືດບອດ ເພາະອໍານາດແຫ່ງກາມ ຖືກຕັນຫາ ເປັນດັ່ງແຮ້ວເຄື່ອງດັກສັຕ ຢຶດຄຸມໄວ້ ຖືກເຄື່ອງມຸງຄື ຕັນຫາ ປິດບັງໄວ້ ຖືກໝູ່ມາຣ ຊຶ່ງເປັນ ເໝືອນພວກພ້ອງຂອງຜູ້ປະມາດກັກຂັງໂຕໄວ້ ຍ່ອມໄປສູ່ຊະຣາ ແລະມໍຣະນະ ເໝືອນປາເຂົ້າໄປສູ່ປາກແຫ່ງເຄື່ອງດັກ ຫຼືເໝືອນລູກງົວທີ່ຍັງດື່ມນົມເຂົ້າໄປຫາແມ່ ສະນັ້ນ” ດັ່ງນີ້ ແລ.

- ອຸ. ຂຸ. ໒໕/໒໐໐/໑໕໐.