ປຽບເໝືອນບຸຣຸດເຜົາແມ່ນ້ຳຄົງຄາ

ພິກຂຸທັງຫລາຍ! ປຽບເໝືອນບຸຣຸສຖືເອົາມັດຫຍ້າທີ່ຈູດໄຟມາແລ້ວ ກ່າວຢ່າງນີ້ວ່າ ເຮົາຈັກກະທຳແມ່ນ້ຳຄົງຄາໃຫ້ຮ້ອນຢ່າງຍິ່ງ ໃຫ້ເດືອດເປັນຄັວນຟຸ້ງຂຶ້ນດ້ວຍມັດຫຍ້າທີ່ຈູດໄຟແລ້ວນີ້ ດັ່ງນີ້.

ພິກຂຸທັງຫລາຍ! ພວກເຈົ້າທັງຫລາຍຈະສຳຄັນຄວາມຂໍ້ນັ້ນວ່າຢ່າງໃດ ບຸຣຸສນັ້ນຈັກກະທຳແມ່ນ້ຳຄົງຄາໃຫ້ຮ້ອນ ໃຫ້ເດືອດເປັນຄັວນຟຸ້ງຂຶ້ນດ້ວຍມັດຫຍ້າທີ່ຈູດໄຟໄດ້ຫລືບໍ່ ?

ບໍ່ໄດ້ເລີຍ ພຣະອົງຄ໌ຜູ້ຈະເຣີນ!

ຂໍ້ນັ້ນເພາະເຫຕໃດ?

ເພາະແມ່ນ້ຳຄົງຄາເປັນແມ່ນ້ຳທີ່ເລິກ ສຸດທີ່ຈະປະມານ ເຂົາຈັກກະທຳແມ່ນ້ຳຄົງຄານັ້ນໃຫ້ຮ້ອນ ໃຫ້ເດືອດເປັນຄັວນຟຸ້ງຂຶ້ນດ້ວຍມັດຫຍ້າທີ່ຈູດໄຟແລ້ວບໍ່ໄດ້ງ່າຍເລີຍ ແລະບຸຣຸສນັ້ນຈະຕ້ອງອິດເມື່ອຍລຳບາກເປົ່າຢ່າງແນ່ນອນ ນີ້ສັນໃດ;

ພິກຂຸທັງຫລາຍ! ທາງແຫ່ງຖ້ອຍຄຳທີ່ບຸຄຄົລອື່ນຈະກ່າວກັບເຈົ້າມີຢູ່ ໕ ປະກາຣຄື:
ກາຣກ່າວໂດຍກາລອັນສົມຄວນຫລືບໍ່ສົມຄວນ ໑
ກ່າວດ້ວຍເຣື່ອງຈິງຫລືເຣື່ອງບໍ່ຈິງ ໑
ກ່າວດ້ວຍຄຳອ່ອນຫວານຫລືຄຳຫຍາບຄາຍ ໑
ກ່າວດ້ວຍຄຳທີ່ປະກອບດ້ວຍປະໂຍຊນ໌
ຫລືບໍ່ປະກອບດ້ວຍປະໂຍຊນ໌ ໑
ມີຈິຕເມຕຕາຫລືມີໂທສະໃນພາຍໃນກ່າວ ໑

ພິກຂຸທັງຫລາຍ! ເມື່ອບຸຄຄົລອື່ນຈະກ່າວໂດຍກາລອັນສົມຄວນຫລືບໍ່ສົມຄວນກໍຕາມ, ຈະກ່າວດ້ວຍເຣື່ອງຈິງຫລືເຣື່ອງບໍ່ຈິງກໍຕາມ, ຈະກ່າວດ້ວຍຖ້ອຍຄໍາອ່ອນຫວານຫລືຄຳຫຍາບຄາຍກໍຕາມ, ຈະກ່າວດ້ວຍຖ້ອຍຄໍາທີ່ປະກອບດ້ວຍປະໂຍຊນ໌ ຫລືບໍ່ປະກອບດ້ວຍປະໂຍຊນ໌ກໍຕາມ, ຈະມີຈິຕເມຕຕາ ຫລືມີໂທສະໃນພາຍໃນກ່າວກໍຕາມ;

ພິກຂຸທັງຫລາຍ! ໃນຂໍ້ນັ້ນ ພວກເຈົ້າທັງຫລາຍຄວນສຶກສາຢ່າງນີ້ວ່າ ຈິຕຂອງເຮົາຈັກບໍ່ປັ່ນປ່ວນ ເຮົາຈັກບໍ່ກ່າວວາຈາອັນຊົ່ວຫຍາບ ເຮົາຈັກອະນຸເຄາະດ້ວຍສິ່ງອັນເປັນປະໂຍຊນ໌ ເຮົາຈັກມີເມຕຕາ ບໍ່ມີໂທສະໃນພາຍໃນ ເຮົາຈັກແຜ່ເມຕຕາໄປເຖິງບຸຄຄົລນັ້ນ ແລະເຮົາຈັກແຜ່ເມຕຕາຈິຕອັນໄພບູນ ຍິ່ງໃຫຍ່ ຫາປະມານບໍ່ໄດ້ ບໍ່ມີເວຣ ບໍ່ມີພະຍາບາທ ໄປຕະຫລອດໂລກທັງປວງ ເຊິ່ງເປັນອາຣົມນ໌ຂອງຈິຕນັ້ນ ດັ່ງນີ້.

ພິກຂຸທັງຫລາຍ! ພວກເຈົ້າທັງຫລາຍຄວນສຶກສາດ້ວຍອາກາຣດັ່ງທີ່ກ່າວມານີ້ແລ.


ມັຊຊິມະນິກາຍ ມູລປັນນາສກ໌ ໑໒/໑໗໙/໒໗໐