ຄຸນສົມບັດພຣະໂສດາບັນ (ໃນຍະທີ 4) (ໂສຕາປັດຕິຍັງຄະ 4 ຈຳແນກດ້ວຍອາການ 10)

ກໍສະມັຍນັ້ນ ທ່ານອະນາຖະບິນດິກະຄະຫະບໍດີປ່ວຍ ໄດ້ຮັບທຸກຂ໌ ເປັນໄຂ້ໜັກ ເມື່ອນັ້ນ ທ່ານອະນາຖະບິນດິກະຄະຫະບໍດີເອີ້ນບຸຣຸສຜູ້ໜຶ່ງມາສັ່ງວ່າ ບຸຣຸສຜູ້ຈະເຣີນ ! ທ່ານຈົ່ງໄປເຖີ້ນ ຈົ່ງເຂົ້າໄປຫາທ່ານພຣະສາຣີບຸຕ ຄັນແລ້ວ ຈົ່ງໄຫວ້ບາທາທັງສອງຂອງທ່ານພຣະສາຣີບຸຕດ້ວຍຫົວ ຕາມຄຳຂອງເຮົາວ່າ ຂ້າແຕ່ທ່ານຜູ້ຈະເຣີນ ! ອະນາຖະບິນທິກະຄະຫະບໍດີປ່ວຍ ໄດ້ຮັບທຸກຂ໌ ເປັນໄຂ້ໜັກ ເຂົາຂໍກາບບາທາທັງສອງຂອງທ່ານພຣະສາຣີບຸຕດ້ວຍຫົວ ແລະທ່ານຈົ່ງຮຽນຢ່າງນີ້ວ່າ ຂ້າແຕ່ທ່ານຜູ້ຈະເຣີນ ! ໄດ້ໂຜດເຖີ້ນ ຂໍທ່ານພຣະສາຣີບຸຕຈົ່ງອາສັຍຄວາມອະນຸເຄາະເຂົ້າໄປຍັງນິເວດຂອງທ່ານອະນາຖະບິນດິກະຄະຫະບໍດີເຖີ້ນ

ບຸຣຸສນັ້ນຮັບຄຳຂອງທ່ານອະນາຖະບິນດິກະຄະຫະບໍດີແລ້ວ ເຂົ້າໄປຫາທ່ານພຣະສາຣີບຸຕເຖິງທີ່ຢູ່ ອະພິວາດແລ້ວ ນັ່ງ ນະ ທີ່ຄວນສ່ວນຂ້າງໜຶ່ງ ຄັນແລ້ວໄດ້ຮຽນວ່າ ຂ້າແຕ່ທ່ານຜູ້ຈະເຣີນ ! ທ່ານອະນາຖະບິນດິກະຄະຫະບໍດີປ່ວຍ ໄດ້ຮັບທຸກຂ໌ ເປັນໄຂ້ໜັກ ເພິ່ນຂໍກາບຕີນທັງສອງຂອງທ່ານພຣະສາຣີບຸຕດ້ວຍຫົວ ແລະເພິ່ນສັ່ງມາຢ່າງນີ້ວ່າ ຂ້າແຕ່ທ່ານຜູ້ຈະເຣີນ ! ໄດ້ໂຜດເຖີ້ນ ຂໍທ່ານພຣະສາຣີບຸຕຈົ່ງອາສັຍຄວາມອະນຸເຄາະເຂົ້າໄປຍັງນິເວດຂອງທ່ານອະນາຖະບິນດິກະຄະຫະບໍດີເຖີ້ນ. ທ່ານພຣະສາຣີບຸຕ ຮັບນິມົນດ້ວຍດຸສະນີພາບ.
ເທື່ອນັ້ນ ເວລາເຊົ້າ ທ່ານພຣະສາຣີບຸຕນຸ່ງແລ້ວ ຖືບາຕແລະຈີວອນ ມີທ່ານພຣະອານົນທ໌ເປັນປັສສາສະມະນະ ເຂົ້າໄປຍັງນິເວດຂອງທ່ານອະນາຖະບິນດິກະຄະຫະບໍດີ ແລ້ວນັ່ງເທິງອາສະນະທີ່ເຂົາປູໄວ້ ຄັນແລ້ວໄດ້ຖາມທ່ານອະນາຖະບິນດິກະຄະຫະບໍດີວ່າ ຄະຫະບໍດີ ! ທ່ານພໍອົດທົນໄດ້ຫຼື ພໍຍັງອັຕຕະພາບໃຫ້ເປັນໄປໄດ້ຫຼືບໍ່ ທຸກຂະເວທະນາຄາຍລົງ ບໍ່ກຳເລີບຂຶ້ນແລຫຼື ຄວາມທຸເລົາໄຄແນ່ຍ່ອມປາກົດ ຄວາມກຳເລີບບໍ່ປາກົດແລຫຼື ?

ຂ້າແຕ່ທ່ານຜູ້ຈະເຣີນ ! ຂ້າພະເຈົ້າອົດທົນບໍ່ໄດ້ ຍັງອັຕຕະພາບໃຫ້ເປັນໄປບໍ່ໄດ້ ທຸກຂະເວທະນາຂອງຂ້າພະເຈົ້າກຳເລີບໜັກ ບໍ່ທຸເລົາລົງເລີຍ ຄວາມກຳເລີບຍ່ອມປາກົດ ຄວາມທຸເລົາບໍ່ປາກົດ.
ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍຄວາມບໍ່ເຫຼື້ອມໃສໃນພຣະພຸດທະເຈົ້າເຫັນປານໃດ ເມື່ອແຕກກາຍຕາຍໄປຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ຄວາມບໍ່ເຫຼື້ອມໃສໃນພຣະພຸດທະເຈົ້າເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີຄວາມເຫຼື້ອມໃສອັນບໍ່ຫວັ່ນໄຫວໃນພຣະພຸດທະເຈົ້າວ່າ ແມ່ນເພາະເຫຕນີ້ໆ ພຣະຜູ້ມີພຣະພາຄພຣະອົງຄ໌ນັ້ນ... ເປັນຜູ້ຈຳແນກທັມ ກໍເມື່ອທ່ານເຫັນຄວາມເຫຼື້ອມໃສອັນບໍ່ຫວັ່ນໄຫວໃນພຣະພຸດທະເຈົ້ານັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍຄວາມບໍ່ເຫຼື້ອມໃສໃນພຣະທັມເຫັນປານໃດ ເມື່ອແຕກກາຍຕາຍໄປຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ຄວາມບໍ່ເຫຼື້ອມໃສໃນພຣະທັມເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີຄວາມເຫຼື້ອມໃສອັນບໍ່ຫວັ່ນໄຫວໃນພຣະທັມ ວ່າທັມອັນພຣະຜູ້ມີພຣະພາຄຕຣັສໄວ້ດີແລ້ວ... ອັນວິນຍູຊົນຍ່ອມຮູ້ສະເພາະຕົນ ກໍເມື່ອທ່ານເຫັນຄວາມເຫຼື້ອມໃສອັນບໍ່ຫວັ່ນໄຫວໃນພຣະທັມນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍຄວາມບໍ່ເຫຼື້ອມໃສໃນພຣະສົງຄ໌ເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ຄວາມບໍ່ເຫຼື້ອມໃສໃນພຣະສົງຄ໌ເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີຄວາມເຫຼື້ອມໃສໃນພຣະສົງຄ໌ ວ່າ ພຣະສົງຄ໌ສາວົກຂອງພຣະຜູ້ມີພຣະພາຄເປັນຜູ້ປະຕິບັຕດີແລ້ວ... ເປັນນາບຸນຂອງໂລກ ບໍ່ມີນາບຸນອື່ນຍິ່ງກວ່າ ກໍເມື່ອທ່ານເຫັນຄວາມເຫຼື້ອມໃສອັນບໍ່ຫວັ່ນໄຫວໃນພຣະສົງຄ໌ນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.
ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍຄວາມເປັນຜູ້ທຸສີລເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ຄວາມເປັນຜູ້ທຸສີລເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສີລທີ່ພຣະອະຣິຍະເຈົ້າຮັກໃຄ່ແລ້ວບໍ່ຂາດ... ເປັນໄປເພື່ອສະມາທິ ກໍເມື່ອທ່ານເຫັນສີລທີ່ພຣະອະຣິຍະເຈົ້າຮັກໃຄ່ແລ້ວຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາທິຕຖິເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາທິຕຖິເຫັນປານນັ້ນຍ່ອມບໍ່ມີແກ່ທ່ານ ສ່ວນທ່ານມີສັມມາທິຕຖິ ກໍເມື່ອທ່ານເຫັນສັມມາທິຕຖິນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.
ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາສັງກັບປະເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາສັງກັບປະເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສັມມາສັງກັບປະ ກໍເມື່ອທ່ານເຫັນສັມມາສັງກັບປະນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາວາຈາເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາວາຈາເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສັມມາວາຈາ ກໍເມື່ອທ່ານເຫັນສັມມາວາຈານັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາກັມມັນຕະເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາກັມມັນຕະເຫັນປານນັ້ນຍ່ອມບໍ່ມີແກ່ທ່ານ ສ່ວນທ່ານມີສັມມາກັມມັນຕະ ກໍເມື່ອທ່ານເຫັນສັມມາກັມມັນຕະນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.
ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາອາຊີວະເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາອາຊີວະເຫັນປານນັ້ນຍ່ອມບໍ່ມີແກ່ທ່ານ ສ່ວນທ່ານມີສັມມາອາຊີວະ ກໍເມື່ອທ່ານເຫັນສັມມາອາຊີວະນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາວາຍາມະເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາວາຍາມະເຫັນປານນັ້ນຍ່ອມບໍ່ມີແກ່ທ່ານ ສ່ວນທ່ານມີສັມມາວາຍາມະ ກໍເມື່ອທ່ານເຫັນສັມມາວາຍາມະນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາສະຕິເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາສະຕິເຫັນປານນັ້ນ ຍ່ອມບໍ່ມີແກ່ທ່ານສ່ວນທ່ານມີສັມມາສະຕິ ກໍເມື່ອທ່ານເຫັນສັມມາສະຕິນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.
ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາສະມາທິເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາສະມາທິເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສັມມາສະມາທິ ກໍເມື່ອທ່ານເຫັນ ສັມມາສະມາທິນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາຍານະເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາຍານະເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສັມມາຍານະ ກໍເມື່ອທ່ານເຫັນສັມມາຍານະນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍພັນ.

ຄະຫະບໍດີ ! ປຸຖຸຊົນຜູ້ບໍ່ໄດ້ສະດັບ ປະກອບດ້ວຍມິຈສາວິມຸຕເຫັນປານໃດ ເມື່ອແຕກກາຍຕາຍໄປ ຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ ມິຈສາວິມຸຕເຫັນປານນັ້ນ ຍ່ອມບໍ່ມີແກ່ທ່ານ ສ່ວນທ່ານມີສັມມາວິມຸຕ ກໍເມື່ອທ່ານເຫັນສັມມາວິມຸຕ ນັ້ນຢູ່ໃນຕົນ ເວທະນາຈະຍ່ອມສະງົບລະງັບໂດຍໄວ.
ຄັ້ງນັ້ນ ເວທະນາຂອງທ່ານອະນາຖະບິນດິກະຄະຫະບໍດີ ສະງົບລະງັບແລ້ວໂດຍໄວ ທ່ານອະນາຖະບິນດິກະຄະຫະບໍດີອັງຄາສທ່ານພຣະສາຣີບຸຕແລະທ່ານພຣະອານົນທ໌ດ້ວຍອາຫານ ທີ່ເຂົາຈັດມາສະເພາະຕົນ ເທື່ອນັ້ນ ທ່ານອະນາຖະບິນດິກະຄະຫະບໍດີ ເມື່ອທ່ານພຣະສາຣີບຸຕສັນແລ້ວ ເອົາມືອອກຈາກບາຕແລ້ວ ຈຶ່ງຖືເອົາອາສະນະຕ່ຳ ອັນໜຶ່ງ ນັ່ງ ນະ ທີ່ຄວນສ່ວນຂ້າງໜຶ່ງແລ້ວ ທ່ານພຣະສາຣີບຸຕອະນຸໂມທະນາດ້ວຍຄາຖາເຫຼົ່ານີ້

ຜູ້ໃດມີສັດທາ ຕັ້ງໝັ້ນບໍ່ຫວັ່ນໄຫວ ໃນພຣະຕະຖາຄົຕມີສີລອັນງາມ ທີ່ພຣະອະຣິຍະເຈົ້າຮັກໃຄ່ແລ້ວ ສັນເສີນແລ້ວ ມີຄວາມເຫຼື້ອມໃສໃນພຣະສົງຄ໌ ແລະມີຄວາມເຫັນອັນຕົງ ບັນດິຕທັງຫຼາຍ ເອີ້ນຜູ້ນັ້ນວ່າ ເປັນຄົນບໍ່ຂັດສົນ ຊີວິດຂອງຜູ້ນັ້ນບໍ່ເປົ່າປະໂຍຊນ໌ ເພາະສະນັ້ນບຸກຄົນຜູ້ມີປັນຍາ ເມື່ອລະນຶກເຖິງຄຳສອນຂອງພຣະພຸດທະເຈົ້າທັງຫຼາຍ ຄວນປະກອບຕາມຊຶ່ງສັດທາ ສີລ ຄວາມເຫຼື້ອມໃສ ແລະຄວາມເຫັນທັມ.
ເທື່ອນັ້ນ ທ່ານພຣະສາຣີບຸຕ ຄັນອະນຸໂມທະນາດ້ວຍຄາຖາເຫຼົ່ານີ້ແລ້ວ ຈຶ່ງລຸກຈາກອາສະນະຫຼີກໄປ.

ລຳດັບນັ້ນ ທ່ານພຣະອານົນທ໌ເຂົ້າໄປເຝົ້າພຣະຜູ້ມີພຣະພາຄເຖິງທີ່ປະທັບ ຖວາຍບັງຄົມພຣະຜູ້ມີພຣະພາຄແລ້ວ ນັ່ງ ນະ ທີ່ຄວນສ່ວນຂ້າງໜຶ່ງ ຄັນແລ້ວພຣະຜູ້ມີພຣະພາຄໄດ້ຕຣັສຖາມທ່ານພຣະອານົນທ໌ວ່າ
ອານົນທ໌ ! ເຈົ້າມາຈາກໃສແຕ່ຍັງເວັນ.
ຂ້າແຕ່ພຣະອົງຄ໌ຜູ້ຈະເຣີນ ! ທ່ານພຣະສາຣີບຸຕກ່າວສອນ ອະນາຖະບິນດິກະຄະຫະບໍດີດ້ວຍໂອວາດຂໍ້ນີ້ໆ.
ອານົນທ໌ !
ສາຣີບຸຕເປັນບັນດິຕ
ສາຣີບຸຕມີປັນຍາຫຼາຍ
ໄດ້ຈຳແນກໂສຕາປັຕຕິຍັງຄະ ໔
ດ້ວຍອາການ ໑໐ ຢ່າງ.

- ບາລີ ມຫາວາຣ. ສັງ. ໑໙/໔໗໙/໑໕໔໙.