ອະຣິຍະວົງ 4 ທີ່ວິນຍູຊົນສັນລະເສີນວ່າເປັນເລີດ

ພິກຂຸທັງຫລາຍ! ອະຣິຍະວົງສ໌ ໔ ປະກາຣນີ້ ວິນຍູຊົນສັນລະເສີນວ່າເປັນເລີດ ມີມານານ ເປັນເຊື້ອສາຍແຫ່ງພຣະອະຣິຍະ ເປັນຂອງເກົ່າ ບໍ່ກະແຈກກະຈາຍ ບໍ່ເຄີຍກະແຈກກະຈາຍ ອັນບັນດິຕບໍ່ລັງກຽດ ຈັກບໍ່ລັງກຽດ ວິນຍູຊົນທັງສະມະນະແລະພຣາມນ໌ບໍ່ລັງກຽດ. ອະຣິຍະວົງສ໌ ໔ ປະກາຣເປັນຢ່າງໃດ?

ພິກຂຸທັງຫລາຍ! ພິກຂຸໃນທັມວິນັຍນີ້ ເປັນຜູ້ສັນໂດດດ້ວຍຈີວອຣຕາມມີຕາມໄດ້ ແລະເປັນຜູ້ກ່າວສັນລະເສີນຄຸນແຫ່ງຄວາມສັນໂດດດ້ວຍຈີວອຣຕາມມີຕາມໄດ້ ບໍ່ເຖິງກາຣສະ ແຫວງຫາອັນບໍ່ສົມຄວນເພາະເຫຕແຫ່ງຈີວອຣ ບໍ່ໄດ້ຈີວອຣກໍບໍ່ສະດຸ້ງ ຄັນໄດ້ຈີວອຣແລ້ວ ກໍບໍ່ກຳນັດ ບໍ່ມົວເມົາ ບໍ່ຫລົງ ມີປົກກະຕິເຫັນໂທສ ມີປັນຍາເປັນເຄື່ອງສະລັດອອກ ໃຊ້ສອຍຢູ່ ບໍ່ຍົກຕົນ ບໍ່ຂົ່ມຜູ້ອື່ນເພາະເຫຕແຫ່ງຄວາມສັນໂດດດ້ວຍຈີວອຣຕາມມີຕາມໄດ້ນັ້ນ. ຈິງຢູ່ ພິກຂຸໃດເປັນຜູ້ຂະຫຍັນ ບໍ່ກຽດຄ້ານໃນກາຣສັນໂດດດ້ວຍຈີວອຣຕາມມີຕາມໄດ້ນັ້ນ ມີສັມປະຊັນຍະ ມີສະຕິສະເພາະໜ້າ. ພິກຂຸທັງຫລາຍ ພິກຂຸນີ້ເຮົາກ່າວວ່າ ເປັນຜູ້ຕັ້ງຢູ່ໃນອະຣິຍະວົງສ໌ອັນເປັນຂອງເກົ່າ ເຊິ່ງວິນຍູຊົນສັນລະເສີນວ່າເປັນເລີດ.

ພິກຂຸທັງຫລາຍ! ອີກປະກາຣໜຶ່ງ ພິກຂຸເປັນຜູ້ສັນໂດດດ້ວຍບິນທະບາຕຕາມມີຕາມໄດ້ ແລະເປັນຜູ້ກ່າວສັນລະເສີນຄຸນແຫ່ງຄວາມສັນໂດດດ້ວຍບິນທະບາຕຕາມມີຕາມໄດ້ ບໍ່ເຖິງກາຣສະແຫວງຫາອັນບໍ່ສົມຄວນເພາະເຫຕແຫ່ງບິນທະບາຕ ບໍ່ໄດ້ບິນທະບາຕກໍບໍ່ສະດຸ້ງ ຄັນໄດ້ບິນທະບາຕແລ້ວ ກໍບໍ່ກຳນັດ ບໍ່ມົວເມົາ ບໍ່ຫລົງ ມີປົກກະຕິເຫັນໂທສ ມີປັນຍາເປັນເຄື່ອງສະລັດອອກ ໃຊ້ສອຍຢູ່ ບໍ່ຍົກຕົນ ບໍ່ຂົ່ມຜູ້ອື່ນເພາະເຫຕແຫ່ງຄວາມສັນໂດດດ້ວຍບິນທະບາຕຕາມມີຕາມໄດ້ນັ້ນ. ຈິງຢູ່ ພິກຂຸໃດເປັນຜູ້ຂະຫຍັນ ບໍ່ກຽດຄ້ານໃນກາຣສັນໂດດດ້ວຍບິນທະບາຕຕາມມີຕາມໄດ້ນັ້ນ ມີສັມປະຊັນຍະ ມີສະຕິສະເພາະໜ້າ. ພິກຂຸທັງຫລາຍ ພິກຂຸນີ້ເຮົາກ່າວວ່າ ເປັນຜູ້ຕັ້ງຢູ່ໃນອະຣິຍະວົງສ໌ອັນເປັນຂອງເກົ່າ ເຊິ່ງວິນຍູຊົນສັນລະເສີນວ່າເປັນເລີດ.

ພິກຂຸທັງຫລາຍ! ອີກປະກາຣໜຶ່ງ ພິກຂຸເປັນຜູ້ສັນໂດດດ້ວຍເສນາສະນະຕາມມີຕາມໄດ້ ແລະເປັນຜູ້ກ່າວສັນລະເສີນຄຸນແຫ່ງຄວາມສັນໂດດດ້ວຍເສນາສະນະຕາມມີຕາມໄດ້ ບໍ່ເຖິງກາຣສະແຫວງຫາອັນບໍ່ສົມຄວນເພາະເຫຕແຫ່ງເສນາສະນະ ບໍ່ໄດ້ເສນາສະນະກໍບໍ່ສະດຸ້ງ ຄັນໄດ້ເສນາສະນະແລ້ວ ກໍບໍ່ກຳນັດ ບໍ່ມົວເມົາ ບໍ່ຫລົງ ມີປົກກະຕິເຫັນໂທສ ມີປັນຍາເປັນເຄື່ອງສະລັດອອກ ໃຊ້ສອຍຢູ່ ບໍ່ຍົກຕົນ ບໍ່ຂົ່ມຜູ້ອື່ນເພາະເຫຕແຫ່ງຄວາມສັນໂດດດ້ວຍເສນາສະນະຕາມມີຕາມໄດ້ນັ້ນ. ຈິງຢູ່ ພິກຂຸໃດເປັນຜູ້ຂະຫຍັນ ບໍ່ກຽດຄ້ານໃນກາຣສັນໂດດດ້ວຍເສນາສະນະຕາມມີຕາມໄດ້ນັ້ນ ມີສັມປະຊັນຍະ ມີສະຕິສະເພາະໜ້າ. ພິກຂຸທັງຫລາຍ ພິກຂຸນີ້ເຮົາກ່າວວ່າ ເປັນຜູ້ຕັ້ງຢູ່ໃນອະຣິຍະວົງສ໌ອັນເປັນຂອງເກົ່າ ເຊິ່ງວິນຍູຊົນສັນລະເສີນວ່າເປັນເລີດ.

ພິກຂຸທັງຫລາຍ! ອີກປະກາຣໜຶ່ງ ພິກຂຸເປັນຜູ້ມີພາວະນາເປັນທີ່ມາຍິນດີ ຍິນດີແລ້ວໃນພາວະນາ ມີປະຫານະເປັນທີ່ມາຍິນດີ ຍິນດີແລ້ວໃນປະຫານະ ບໍ່ຍົກຕົນ ບໍ່ຂົ່ມຜູ້ອື່ນເພາະຄວາມທີ່ມີພາວະນາເປັນທີ່ມາຍິນດີ ເພາະຍິນດີໃນພາວະນາ ເພາະມີປະຫານະເປັນທີ່ມາຍິນດີ ເພາະຍິນດີໃນປະຫານະນັ້ນ. ຈິງຢູ່ ພິກຂຸໃດເປັນຜູ້ຂະຫຍັນ ບໍ່ກຽດຄ້ານໃນພາວະນາແລະປະຫານະນັ້ນ ມີສັມປະຊັນຍະ ມີສະຕິສະເພາະໜ້າ. ພິກຂຸທັງຫລາຍ ພິກຂຸນີ້ເຮົາກ່າວວ່າ ເປັນຜູ້ຕັ້ງຢູ່ໃນອະຣິຍະວົງສ໌ອັນເປັນຂອງເກົ່າ ເຊິ່ງວິນຍູຊົນສັນລະເສີນວ່າເປັນເລີດ.

ພິກຂຸທັງຫລາຍ! ອະຣິຍະວົງສ໌ ໔ ປະກາຣນີ້ແລ ວິນຍູຊົນສັນລະເສີນວ່າເປັນເລີດ ມີມານານ ເປັນເຊື້ອສາຍແຫ່ງພຣະອະຣິຍະ ເປັນຂອງເກົ່າ ບໍ່ກະແຈກກະຈາຍ ບໍ່ເຄີຍກະແຈກກະຈາຍ ອັນບັນດິຕບໍ່ລັງກຽດ ຈັກບໍ່ລັງກຽດ ວິນຍູຊົນທັງສະມະນະແລະພຣາມນ໌ບໍ່ລັງກຽດ.

ພິກຂຸທັງຫລາຍ! ພິກຂຸຜູ້ປະກອບດ້ວຍອະຣິຍະວົງສ໌ ໔ ປະກາຣນີ້ ເຖິງແມ່ນວ່າຢູ່ໃນທິສຕາເວັນອອກ ເຂົາຍ່ອມຄອບງຳຄວາມບໍ່ຍິນດີເສຍໄດ້ ຄວາມບໍ່ຍິນດີຍ່ອມບໍ່ຄອບງຳເຂົາໄດ້.

ເຖິງແມ່ນວ່າຢູ່ໃນທິສຕາເວັນຕົກ ເຂົາຍ່ອມຄອບງຳຄວາມບໍ່ຍິນດີເສຍໄດ້ ຄວາມບໍ່ຍິນດີຍ່ອມບໍ່ຄອບງຳເຂົາໄດ້.

ເຖິງແມ່ນວ່າຢູ່ໃນທິສເໜືອ ເຂົາຍ່ອມຄອບງຳຄວາມບໍ່ຍິນດີເສຍໄດ້ ຄວາມບໍ່ຍິນດີຍ່ອມບໍ່ຄອບງຳເຂົາໄດ້.

ເຖິງແມ່ນວ່າຢູ່ໃນທິສໃຕ້ ເຂົາຍ່ອມຄອບງຳຄວາມບໍ່ຍິນດີເສຍໄດ້ ຄວາມບໍ່ຍິນດີຍ່ອມບໍ່ຄອບງຳເຂົາໄດ້.

ຂໍ້ນັ້ນເພາະເຫຕໃດ?

ເພາະເຂົາເປັນທີຣະຊົນຄອບງຳຄວາມບໍ່ຍິນດີແລະຄວາມຍິນດີໄດ້.

ຄວາມຍິນດີຍ່ອມຄອບງຳທີຣະຊົນບໍ່ໄດ້ ຄວາມບໍ່ຍິນດີບໍ່ສາມາດຄອບງຳທີຣະຊົນ ທີຣະຊົນຍ່ອມຄອບງຳຄວາມບໍ່ຍິນດີໄດ້ ເພາະທີຣະຊົນເປັນຜູ້ຄອບງຳຄວາມບໍ່ຍິນດີ ກິເລສອັນໃດຈະມາກາງກັ້ນບຸຄຄົລຜູ້ກຳຈັດກິເລສເສຍແລ້ວ ມີປົກກະຕິລະກັມທັງປວງໄດ້ເດັດຂາດ ໃຜຈະຕິຕຽນບຸຄຄົລນັ້ນ ຜູ້ເປັນດັ່ງແທ່ງຄຳຊົມພູນຸທ ແມ່ນແຕ່ເທວະດາກໍຍັງຊື່ນຊົມ ພຣົມກໍຍັງສັນລະເສີນເຂົາ.

ອັງຄຸຕຕະຣະນິກາຍ ຈະຕຸກກະນິບາຕ ໒໑/໒໗/໒໘