ສັດຢູ່ໃນອະບາຍມີຫຼາຍ

ພິກຂຸທັງຫຼາຍ ! ປຽບເໝືອນບຸຣຸດຕັດຫຍ້າ ຕົ້ນໄມ້ ກິ່ງໄມ້ ແລະໃບໄມ້ ໃນຊົມພູທະວີບນີ້ ນໍາເອົາມາລວມໄວ້ໃນບ່ອນດຽວກັນ ຄັນເອົາມາລວມໄວ້ໃນບ່ອນດຽວກັນແລ້ວ ເຮັດໃຫ້ເປັນເຄື່ອງສຽບຮ້ອຍ ຄັນເຮັດໃຫ້ເປັນເຄື່ອງສຽບຮ້ອຍແລ້ວ ກໍສຽບສັຕໃຫຍ່ໆ ໃນມະຫາສະມຸດ ໂດຍເຄື່ອງສຽບຂະໜາດໃຫຍ່ ສຽບສັຕຂະໜາດກາງໆ ໃນມະຫາສະມຸດ ໂດຍເຄື່ອງສຽບ ຂະໜາດກາງ ສຽບສັຕຂະໜາດນ້ອຍໆ ໃນມະຫາສະມຸດ ໂດຍເຄື່ອງສຽບຂະໜາດນ້ອຍ.
ພິກຂຸທັງຫຼາຍ ! ສັຕໃຫຍ່ໆ ໃນມະຫາສະມຸດຍັງບໍ່ທັນໝົດ ແຕ່ຫຍ້າ ຕົ້ນໄມ້ ກິ່ງໄມ້ແລະໃບໄມ້ ໃນຊົມພູທະວີບນີ້ ກໍໝົດເສຍແລ້ວ.
ພິກຂຸທັງຫຼາຍ ! ສັຕໂຕນ້ອຍ ໃນມະຫາສະມຸດຂະໜາດທີ່ສຽບດ້ວຍເຄື່ອງສຽບໄດ້ໂດຍຍາກນັ້ນ ມີຫຼາຍກວ່ານັ້ນໂດຍແທ້.
ຂໍ້ນີ້ເພາະເຫດໃດໜໍ ?
ພິກຂຸທັງຫຼາຍ ! ເພາະມັນຫຼາຍ ໂດຍໂຕມັນນ້ອຍ ຂໍ້ນີ້ເຊັ່ນໃດ

ພິກຂຸທັງຫຼາຍ ! ອະບາຍກໍກວ້າງໃຫຍ່ເຊັ່ນນັ້ນເໝືອນກັນ. ຈາກອະບາຍທີ່ກວ້າງໃຫຍ່ເຊັ່ນນັ້ນ ກໍມີທິດຖິສັມປັນນະບຸກຄົນ ຫຼຸດພົ້ນອອກມາໄດ້ ເຂົາຮູ້ຕາມເປັນຈິງ ວ່າ “ນີ້ທຸກຂ໌, ນີ້ເຫດໃຫ້ເກີດຂຶ້ນແຫ່ງທຸກຂ໌, ນີ້ຄວາມດັບບໍ່ເຫຼືອແຫ່ງທຸກຂ໌, ນີ້ທາງດໍາເນີນໃຫ້ເຖິງຄວາມດັບບໍ່ເຫຼືອແຫ່ງທຸກຂ໌” ດັ່ງນີ້.

ພິກຂຸທັງຫຼາຍ ! ເພາະເຫດນັ້ນໃນເລື່ອງນີ້
ເຈົ້າຕ້ອງປະກອບໂຢຄະກັມ ອັນເປັນເຄື່ອງເຮັດໃຫ້ຮູ້ວ່າ
“ທຸກຂ໌ເປັນເຊັ່ນນີ້,
ເຫດໃຫ້ເກີດຂຶ້ນແຫ່ງທຸກຂ໌ເປັນເຊັ່ນນີ້,
ຄວາມດັບບໍ່ເຫຼືອແຫ່ງທຸກຂ໌ເປັນເຊັ່ນນີ້,
ທາງດໍາເນີນໃຫ້ເຖິງຄວາມດັບບໍ່ເຫຼືອແຫ່ງທຸກຂ໌ເປັນເຊັ່ນນີ້” ດັ່ງນີ້.

- ບາລີ ມຫາວາຣ. ສັງ. ໑໙/໕໕໑/໑໗໑໙.