ພຣະຜູ້ມີພຣະພາກຊົງສັນລະເສີນການຍິນດີດ້ວຍປັດໃຈຕາມມີຕາມໄດ້

ກໍໂດຍສມັຍນັ້ນ ພຣະກາຍຂອງພຣະຜູ້ມີພຣະພາຄໝັກໝົມດ້ວຍສິ່ງອັນເປັນໂທສ ພຣະຜູ້ມີພຣະພາຄຈຶ່ງຕຣັສສັ່ງກັບທ່ານ ພຣະອານົນທ໌ວ່າ:

ອານົນທ໌! ກາຍຂອງຕະຖາຄົຕໝັກໝົມດ້ວຍສິ່ງອັນເປັນໂທສ ຕະຖາຄົຕຕ້ອງກາຣສັນຢາຖ່າຍ.
ຄັ້ງນັ້ນ ທ່ານພຣະອານົນທ໌ເດີນໄປຫາຊີວົກໂກມາຣະພັຈຈ໌ ຄັນເຖິງແລ້ວໄດ້ກ່າວກັບຊີວົກໂກມາຣະພັຈຈ໌ວ່າ:

ທ່ານຊີວົກ! ພຣະກາຍຂອງພຣະຜູ້ມີພຣະພາຄໝັກໝົມດ້ວຍສິ່ງອັນເປັນໂທສ ພຣະຕະຖາຄົຕຕ້ອງກາຣສະເຫວີຍພຣະໂອສົຖຖ່າຍ.

ຊີວົກໂກມາຣະພັຈຈ໌ກ່າວວ່າ:

ຂ້າແຕ່ທ່ານຜູ້ຈະເຣີນ! ຖ້າຢ່າງນັ້ນ ຂໍທ່ານຈົ່ງໂປດກະທຳພຣະກາຍຂອງພຣະຜູ້ມີພຣະພາຄໃຫ້ຊຸ່ມຊື່ນຈັກ ໒-໓ ວັນ.

ຄັ້ງນັ້ນ ທ່ານພຣະອານົນທ໌ໄດ້ກະທຳພຣະກາຍຂອງພຣະຜູ້ມີພຣະພາຄໃຫ້ຊຸ່ມຊື່ນ ໒-໓ ວັນແລ້ວ ເດີນໄປຫາຊີວົກໂກມາຣະພັຈຈ໌ ຄັນເຖິງແລ້ວໄດ້ກ່າວກັບຊີວົກໂກມາຣະພັຈຈ໌ວ່າ:

ທ່ານຊີວົກ! ພຣະກາຍຂອງພຣະຜູ້ມີພຣະພາຄຊຸ່ມຊື່ນແລ້ວ ບັດນີ້ ທ່ານຈົ່ງຮູ້ກາລອັນຄວນເຖີດ.

ຄັ້ງນັ້ນ ຊີວົກໂກມາຣະພັຈຈ໌ໄດ້ມີຄວາມປະຣິວິຕົກດັ່ງນີ້ວ່າ: ກາຣທີ່ເຮົາຈະທູລຖວາຍພຣະໂອສົຖຖ່າຍທີ່ຫຍາບແກ່ພຣະຜູ້ມີພຣະພາຄນັ້ນບໍ່ສົມຄວນເລີຍ ຖ້າເຊັ່ນນັ້ນເຮົາຄວນອົບກ້ານອຸບົນ ໓ ກ້ານດ້ວຍຢາຕ່າງໆ ແລ້ວທູລຖວາຍພຣະຕະຖາຄົຕ ຄັນແລ້ວໄດ້ອົບກ້ານອຸບົນ ໓ ກ້ານດ້ວຍຢາຕ່າງໆ ແລ້ວເຂົ້າເຝົ້າພຣະຜູ້ມີພຣະພາຄ ຄັນແລ້ວໄດ້ທູລຖວາຍກ້ານອຸບົນກ້ານທີໜຶ່ງແດ່ພຣະຜູ້ມີພຣະພາຄ ກຣາບທູລວ່າ:

ຂ້າແຕ່ພຣະອົງຄ໌ຜູ້ຈະເຣີນ! ຂໍພຣະຜູ້ມີພຣະພາຄຈົ່ງຊົງສູບກ້ານອຸບົນກ້ານທີ ໑ ນີ້ ກາຣສູບກ້ານອຸບົນນີ້ຈັກກະທຳໃຫ້ພຣະຜູ້ມີພຣະພາຄຖ່າຍເຖິງ ໑໐ ຄັ້ງ.

ແລ້ວໄດ້ທູລຖວາຍກ້ານອຸບົນກ້ານທີ ໒ ແດ່ພຣະຜູ້ມີພຣະພາຄ ກຣາບທູລວ່າ:

ຂ້າແຕ່ພຣະອົງຄ໌ຜູ້ຈະເຣີນ! ຂໍພຣະຜູ້ມີພຣະພາຄຈົ່ງຊົງສູບກ້ານອຸບົນກ້ານທີ ໒ ນີ້ ກາຣສູບກ້ານອຸບົນນີ້ຈັກກະທຳໃຫ້ພຣະຜູ້ມີພຣະພາຄຖ່າຍເຖິງ ໑໐ ຄັ້ງ.

ແລ້ວໄດ້ທູລຖວາຍກ້ານອຸບົນກ້ານທີ ໓ ແດ່ພຣະຜູ້ມີພຣະພາຄ ກຣາບທູລວ່າ:

ຂ້າແຕ່ພຣະອົງຄ໌ຜູ້ຈະເຣີນ! ຂໍພຣະຜູ້ມີພຣະພາຄຈົ່ງຊົງສູບກ້ານອຸບົນກ້ານທີ ໓ ນີ້ ກາຣສູບກ້ານອຸບົນນີ້ຈັກກະທຳໃຫ້ພຣະຜູ້ມີພຣະພາຄຖ່າຍເຖິງ ໑໐ ຄັ້ງ.

ດ້ວຍວິທີນີ້ ພຣະຜູ້ມີພຣະພາຄຈັກຊົງຖ່າຍເຖິງ ໓໐ ຄັ້ງ.

ຄັນຊີວົກໂກມາຣະພັຈຈ໌ທູລຖວາຍພຣະໂອສົຖຖ່າຍແດ່ພຣະຜູ້ມີພຣະພາຄເພື່ອຖ່າຍຄົບ ໓໐ ຄັ້ງແລ້ວ ຖວາຍບັງຄົມພຣະຜູ້ມີພຣະພາຄ ກະທຳປະທັກຂິນແລ້ວກັບໄປ. ຂະນະທີ່ຊີວົກໂກມາຣະພັຈຈ໌ເດີນອອກໄປນອກຊຸ້ມປະຕູແລ້ວ ໄດ້ມີຄວາມປະຣິວິຕົກຢ່າງນີ້ວ່າ ເຮົາທູລຖວາຍພຣະໂອສົຖຖ່າຍແດ່ພຣະຜູ້ມີພຣະພາຄເພື່ອຖ່າຍຄົບ ໓໐ ຄັ້ງ ພຣະກາຍຂອງພຣະຕະຖາຄົຕໝັກໝົມດ້ວຍສິ່ງອັນເປັນໂທສ ຈັກບໍ່ກະທຳໃຫ້ພຣະຜູ້ມີພຣະພາຄຖ່າຍຄົບ ໓໐ ຄັ້ງ ຈັກຖ່າຍພຽງ ໒໙ ຄັ້ງ ແຕ່ ພຣະຜູ້ມີພຣະພາຄຊົງຖ່າຍແລ້ວຈັກສົງພຣະກາຍ ຄັນສົງພຣະກາຍແລ້ວ ຈັກຖ່າຍອີກຄັ້ງໜຶ່ງ ຢ່າງນີ້ ພຣະຜູ້ມີພຣະພາຄຈັກຊົງຖ່າຍຄົບ ໓໐ ຄັ້ງ.

ຄັ້ງນັ້ນ ພຣະຜູ້ມີພຣະພາຄຊົງຊາບຄວາມປະຣິວິຕົກແຫ່ງຈິຕຂອງຊີວົກໂກມາຣພັຈຈ໌ດ້ວຍພຣະທັຍແລ້ວ ຕຣັສສັ່ງກັບພຣະອານົນທ໌ວ່າ:
ອານົນທ໌! ຊີວົກໂກມາຣະພັຈຈ໌ກຳລັງເດີນອອກນອກຊຸ້ມປະຕູວິຫາຣນີ້ໄດ້ມີຄວາມປະຣິວິຕົກຢ່າງນີ້ວ່າ ເຮົາທູລຖວາຍພຣະໂອສົຖຖ່າຍແດ່ພຣະຜູ້ມີພຣະພາຄເພື່ອຖ່າຍຄົບ ໓໐ ຄັ້ງ ພຣະກາຍຂອງພຣະຕະຖາຄົຕໝັກໝົມດ້ວຍສິ່ງອັນເປັນໂທສ ຈັກບໍ່ກະທຳໃຫ້ພຣະຜູ້ມີພຣະພາຄຖ່າຍຄົບ ໓໐ ຄັ້ງ ຈັກຖ່າຍພຽງ ໒໙ ຄັ້ງ ແຕ່ພຣະຜູ້ມີພຣະພາຄຊົງຖ່າຍແລ້ວຈັກສົງພຣະກາຍ ຄັນສົງພຣະກາຍແລ້ວ ຈັກຖ່າຍອີກຄັ້ງໜຶ່ງ ຢ່າງນີ້ ພຣະຜູ້ມີພຣະພາຄຈັກຊົງຖ່າຍຄົບ ໓໐ ຄັ້ງ. ອານົນທ໌ ຖ້າຢ່າງນັ້ນ ເຈົ້າຈົ່ງຈັດກຽມນ້ຳຮ້ອນໄວ້.

ທ່ານພຣະອານົນທ໌ທູລຮັບສະໜອງພຣະຜູ້ມີພຣະພາຄແລ້ວ ຈັດກຽມນ້ຳຮ້ອນໄວ້ຖວາຍຕໍ່ມາ.

ຊີວົກໂກມາຣະພັຈຈ໌ໄປໃນພຸທທະສຳນັກ ຄັນເຖິງແລ້ວຖວາຍບັງຄົມພຣະຜູ້ມີພຣະພາຄ ນັ່ງໃນທີ່ຄວນສ່ວນຂ້າງໜຶ່ງ ຄັນແລ້ວໄດ້ກຣາບທູລພຣະຜູ້ມີພຣະພາຄວ່າ:

ຂ້າແຕ່ພຣະອົງຄ໌ຜູ້ຈະເຣີນ! ພຣະຜູ້ມີພຣະພາຄຊົງຖ່າຍແລ້ວຫລື?

ເຮົາຖ່າຍແລ້ວ ຊີວົກ!
ຂ້າແຕ່ພຣະອົງຄ໌ຜູ້ຈະເຣີນ! ຂ້ານ້ອຍກຳລັງເດີນອອກນອກຊຸ້ມປະຕູວິຫາຣນີ້ໄດ້ມີຄວາມປະຣິວິຕົກຢ່າງນີ້ວ່າ ເຮົາທູລຖວາຍພຣະໂອສົຖຖ່າຍແດ່ພຣະຜູ້ມີພຣະພາຄເພື່ອຖ່າຍຄົບ ໓໐ ຄັ້ງ ພຣະກາຍຂອງພຣະຕະຖາຄົຕໝັກໝົມດ້ວຍສິ່ງອັນເປັນໂທສ ຈັກບໍ່ກະທຳໃຫ້ພຣະຜູ້ມີພຣະພາຄຖ່າຍຄົບ ໓໐ ຄັ້ງ ຈັກຖ່າຍພຽງ ໒໙ ຄັ້ງ ແຕ່ພຣະຜູ້ມີພຣະພາຄຊົງຖ່າຍແລ້ວຈັກສົງພຣະກາຍ ຄັນສົງພຣະກາຍແລ້ວ ຈັກຖ່າຍອີກຄັ້ງໜຶ່ງ ຢ່າງນີ້ ພຣະຜູ້ມີພຣະພາຄຈັກຊົງຖ່າຍຄົບ ໓໐ ຄັ້ງ.

ຂ້າແຕ່ພຣະອົງຄ໌ຜູ້ຈະເຣີນ! ຂໍພຣະຜູ້ມີພຣະພາຄຈົ່ງໂປດສົງພຣະກາຍ ຂໍພຣະສຸຄົຕຈົ່ງໂປດສົງພຣະກາຍ.

ຄັ້ງນັ້ນ ພຣະຜູ້ມີພຣະພາຄຊົງສົງນ້ຳອຸ່ນ ຄັນສົງແລ້ວ ຊົງຖ່າຍອີກຄັ້ງໜຶ່ງ ຢ່າງນີ້ ພຣະຜູ້ມີພຣະພາຄກໍໄດ້ຖ່າຍຄົບ ໓໐ ຄັ້ງ.

ລຳດັບນັ້ນແລ ຊີວົກໂກມາຣະພັຈຈ໌ທູລຄຳນີ້ແດ່ພຣະຜູ້ມີພຣະພາຄວ່າ:

ຂ້າແຕ່ພຣະອົງຄ໌ຜູ້ຈະເຣີນ! ພຣະຜູ້ມີພຣະພາຄບໍ່ຄວນສະເຫວີຍພຣະກະຍາຫາຣທີ່ປຸງດ້ວຍນ້ຳຕົ້ມຜັກຕ່າງໆ ຈົນກ່ວາຈະມີພຣະກາຍເປັນປົກກະຕິ. ຕໍ່ມາບໍ່ນານເທົ່າໃດ ພຣະກາຍຂອງພຣະຜູ້ມີພຣະພາຄກໍໄດ້ເປັນປົກກະຕິ.

ຄັ້ງນັ້ນ ຊີວົກໂກມາຣະພັຈຈ໌ຖືຜ້າສິໄວຍະກະຄູ່ນັ້ນໄປໃນສຳນັກຂອງພຣະຜູ້ມີພຣະພາຄ ຄັນເຖິງແລ້ວ ຖວາຍບັງຄົມພຣະຜູ້ມີພຣະພາຄ ແລ້ວນັ່ງໃນທີ່ຄວນສ່ວນຂ້າງໜຶ່ງ ຊີວົກໂກມາຣະພັຈຈ໌ນັ່ງຮຽບຮ້ອຍແລ້ວ ໄດ້ກຣາບທູລຄຳນີ້ແດ່ພຣະຜູ້ມີພຣະພາຄວ່າ:

ຂ້າແຕ່ພຣະອົງຄ໌ຜູ້ຈະເຣີນ! ຂ້ານ້ອຍຈະຂໍພອນຕໍ່ພຣະຜູ້ມີພຣະພາຄຈັກຢ່າງໜຶ່ງ.

ພຣະຜູ້ມີພຣະພາຄຕຣັສວ່າ:

ພຣະຕະຖາຄົຕທັງຫລາຍເລີກໃຫ້ພອນເສຍແລ້ວ ຊີວົກ!
ຂ້າແຕ່ພຣະອົງຄ໌ຜູ້ຈະເຣີນ! ຂ້ານ້ອຍຂໍພອນທີ່ສົມຄວນແລະບໍ່ມີໂທສ.

ຈົ່ງວ່າມາເຖີດ ຊີວົກ!

ຂ້າແຕ່ພຣະອົງຄ໌ຜູ້ຈະເຣີນ! ພຣະຜູ້ມີພຣະພາຄແລະພຣະພິກຂຸສົງຄ໌ຖືຜ້າບັງສຸກຸລເປັນປົກກະຕິຢູ່ ຜ້າສິໄວຍະກະຂອງຂ້ານ້ອຍຄູ່ນີ້ ພຣະເຈົ້າປັຊໂຊຕຊົງສົ່ງມາພຣະຣາຊະທານ ເປັນຜ້າເນື້ອດີເລີດ ປະເສີດ ມີຊື່ສຽງເດັ່ນດັງ ແລະເປັນຢ້ຽມກວ່າຜ້າທັງ ຫລາຍ ຕັ້ງຫລາຍຄູ່ ຕັ້ງຫລາຍຮ້ອຍຄູ່ ຫລາຍພັນຄູ່ ຫລາຍແສນຄູ່ ຂໍພຣະຜູ້ມີພຣະພາຄຈົ່ງຊົງພຣະກະຣຸນາໂປດຮັບຜ້າຄູ່ສິໄວຍະກະຂອງຂ້ານ້ອຍດ້ວຍ ແລະຂໍຈົ່ງຊົງພຣະພຸທທານຸຍາຕຄະຫະບໍດີຈີວອຣແກ່ພຣະສົງຄ໌ດ້ວຍເຖີດ ພຣະອົງຄ໌ຜູ້ຈະເຣີນ!

ພຣະຜູ້ມີພຣະພາຄຊົງຮັບຜ້າຄູ່ສິໄວຍະກະແລ້ວ ຄັນແລ້ວຊົງຊີ້ແຈງໃຫ້ຊີວົກໂກມາຣະພັຈຈ໌ເຫັນແຈ້ງ ສະມາທານ ອາດຫານ ຣ່າເຣິງດ້ວຍທັມມິກະຖາ ຄັນຊີວົກໂກມາຣະພັຈຈ໌ ອັນພຣະຜູ້ມີພຣະພາຄຊົງຊີ້ແຈງໃຫ້ເຫັນແຈ້ງ ສະມາທານ ອາດຫານ ຣ່າເຣິງດ້ວຍທັມມິກະຖາແລ້ວ ລຸກຈາກອາສະນະ ຖວາຍບັງຄົມ ພຣະຜູ້ມີພຣະພາຄ ກະທຳປະທັກຂິນແລ້ວກັບໄປ.

ລຳດັບນັ້ນ ພຣະຜູ້ມີພຣະພາຄຊົງກະທຳທັມມິກະຖາໃນເພາະເຫຕອັນເປັນເຄົ້າມູລນັ້ນ ໃນເພາະເຫຕເກີດຂຶ້ນທຳອິດນັ້ນ ແລ້ວຕຣັສສັ່ງກັບພິກຂຸທັງຫລາຍວ່າ:

ພິກຂຸທັງຫລາຍ! ເຮົາອະນຸຍາຕຄະຫະບໍດີຈີວອຣ ອົງຄ໌ໃດປາຖນາຜ້າບັງສຸກຸລ ກໍຈົ່ງຖືຜ້າບັງສຸກຸລ ອົງຄ໌ໃດປາຖນາຄະຫະບໍດີຈີວອຣ ກໍຈົ່ງຍິນດີຄະຫະບໍດີຈີວອຣ,
ແຕ່ເຮົາສັນລະເສີນກາຣຍິນດີດ້ວຍປັຈຈັຍຕາມມີຕາມໄດ້

(ອະນຸຊານາມິ ພິກຂະເວ ຄະຫະປະຕິຈີວະຣັງ ໂຍ ອິຈສະຕິ ປັງສຸກູລິໂກ ໂຫຕຸ ໂຍ ອິຈສະຕິ ຄະຫະປະຕິຈີວະຣັງ ສາທິຍະຕຸ ອິຕະຣີຕະເຣນະ ຈາ-ຫັງ ພິກຂະເວ ສັນຕຸຕຖີ ວັນເນມີຕິ)

ວິນັຍປິດົກ ມະຫາວັຄ ພາຄ ໒ ເຫລັ້ມ ໕/໑໔໗/໑໓໕