ເຮັດໃຈໃຫ້ເໜືອນກັບແຜ່ນດິນ

🏜️ການມີໃຈປະດ້ວຍເມດຕາອຸປະມາເໝືອນແຜ່ນດິນ🏜️

ພິກຂຸທັງຫລາຍ ! ປຽບເໝືອນບຸຣຸດຖືເອົາສຽມ ແລະ ກະຊ້າມາແລ້ວ ກ່າວຢ່າງນີ້ວ່າ ເຮົາຈັກກະທຳແຜ່ນດິນອັນໃຫຍ່ນີ້ບໍ່ໃຫ້ເປັນແຜ່ນດິນ ດັ່ງນີ້, ເຂົາຂຸດລົງໃນທີ່ນັ້ນໆ ຊ້ວນດິນຖິ້ມໃນທີ່ນັ້ນໆ ບ້ວນນ້ຳລາຍລົງໃນທີ່ນັ້ນ ຖ່າຍປັດສາວະຫົດໃນທີ່ນັ້ນໆ ແລ້ວເວົ້າວ່າ ຢ່າເປັນແຜ່ນດິນໆ ດັ່ງນີ້.

ພິກຂຸທັງຫລາຍ ! ພວກເຈົ້າທັງຫລາຍຈະສຳຄັນຄວາມຂໍ້ນັ້ນວ່າຢ່າງໃດ ບຸຣຸດນັ້ນຈັກກະທຳແຜ່ນດິນອັນໃຫຍ່ນີ້ບໍ່ໃຫ້ເປັນແຜ່ນດິນໄດ້ ຫລືບໍ່?

ບໍ່ໄດ້ເລີຍ ພຣະອົງຜູ້ຈະເຣີນ

ຂໍ້ນັ້ນເພາະເຫດໃດ?

ເພາະເຫດວ່າ ແຜ່ນດິນອັນໃຫຍ່ຫລວງນີ້ ເລິກຫາປະມານບໍ່ໄດ້ ເຂົາຈະກະທຳແຜ່ນດິນອັນໃຫຍ່ຫລວງນີ້ບໍ່ໃຫ້ເປັນແຜ່ນດິນບໍ່ໄດ້ງ່າຍເລີຍ ແລະ ບຸຣຸດນັ້ນຈະຕ້ອງອິດເມື່ອຍລຳບາກເສຍເປົ່າແນ່ນອນ ນີ້ສັນໃດ;

ພິກຂຸທັງຫລາຍ ! ທາງແຫ່ງຖ້ອຍຄຳທີ່ບຸກຄົນອື່ນຈະກ່າວກັບເຈົ້າມີຢູ່ 5 ປະການຄື:

1. ການກ່າວໂດຍການອັນສົມຄວນ ຫຼື ບໍ່ສົມຄວນ.
2. ກ່າວດ້ວຍເລື່ອງຈິງ ຫຼື ເລື່ອງບໍ່ຈິງ.
3. ກ່າວດ້ວຍຄຳອ່ອນຫວານ ຫຼື ຄຳຫຍາບຄາຍ .
4. ກ່າວດ້ວຍຄຳປະກອບດ້ວຍປະໂຫຍດ ຫຼື ບໍ່ປະກອບດ້ວຍປະໂຫຍດ.
5. ມີຈິດເມດຕາ ຫຼື ມີໂທສະໃນພາຍໃນກ່າວ.

ພິກຂຸທັງຫລາຍ !
- ເມື່ອບຸກຄົນອື່ນຈະກ່າວໂດຍການອັນສົມຄວນ ຫືຼ ບໍ່ສົມຄວນກໍຕາມ,
- ຈະກ່າວດ້ວຍເລື່ອງຈິງ ຫຼື ເລື່ອງບໍ່ຈິງກໍຕາມ,
- ຈະກ່າວດ້ວຍຖ້ອຍຄໍາອ່ອນຫວານ ຫືຼ ຄຳຫຍາບຄາຍກໍຕາມ,
- ຈະກ່າວດ້ວຍຖ້ອຍຄໍາທີ່ປະກອບດ້ວຍປະໂຫຍດ ຫຼື ບໍ່ປະກອບດ້ວຍປະໂຫຍດກໍຕາມ,
- ຈະມີຈິດເມດຕາ ຫຼື ມີໂທສະໃນພາຍໃນກ່າວກໍຕາມ;

ພິກຂຸທັງຫລາຍ ! ໃນຂໍ້ນັ້ນ ພວກເຈົ້າທັງຫຼາຍຈົ່ງສຶກສາຢ່າງນີ້ວ່າ:

- ຈິດຈັກບໍ່ປັ່ນປວນ
- ຈັກບໍ່ກ່າວວາຈາອັນຊົ່ວຫຍາບ
- ຈັກອະນຸເຄາະດ້ວຍສິ່ງອັນເປັນປະໂຫຍດ
- ຈັກມີເມດຕາ ບໍ່ມີໂທສະໃນພາຍໃນ
- ຈັກແຜ່ເມດຕາໄປເຖິງບຸກຄົນນັ້ນ ແຜ່ເມດຕາຈິດອັນໄພບູນ ຍິ່ງໃຫຍ່ ຫາປະມານບໍ່ໄດ້ ບໍ່ມີເວນ ບໍ່ມີພະຍາບາດ ໄປຕະຫລອດໂລກທັງປວງ ທຸກທິດທຸກທາງ ເຊິ່ງເປັນອາລົມຂອງຈິດນັ້ນ ດັ່ງນີ້.

ພິກຂຸທັງຫຼາຍ ! ພວກເຈົ້າທັງຫລາຍຄວນສຶກສາດ້ວຍອາການດັ່ງທີ່ກ່າວມານີ້ແລ.

----------------------------------------------------
#ມັຊຊິມະນິກາຍ ມູລປັນນາສ 12/176-177/268