ເຫດໃຫ້ທຸຄະຕິປາກົດ

ຈຸນທະ !
ຄວາມບໍ່ສະອາດທາງກາຍ ມີ ໓ ຢ່າງ
ຄວາມບໍ່ສະອາດທາງວາຈາ ມີ ໔ ຢ່າງ
ຄວາມບໍ່ສະອາດທາງໃຈ ມີ ໓ ຢ່າງ.
ຈຸນທະ ! ຄວາມບໍ່ສະອາດທາງກາຍມີ ໓ ຢ່າງ ເປັນແນວໃດໜໍ ? ຈຸນທະ ! ຄົນບາງຄົນໃນກໍລະນີນີ້
(໑) ເປັນຜູ້ ມີປົກກະຕິເຮັດສັຕມີຊີວິດໃຫ້ດັບມອດ ຊົ່ວຊ້າ ມີຝ່າມືເປື້ອນດ້ວຍໂລຫິດ ມີແຕ່ການຂ້າແລະການທຸບຕີ ບໍ່ມີຄວາມເອັນດູໃນສັຕມີຊີວິດ.
(໒) ເປັນຜູ້ມີປົກກະຕິຖືເອົາສິ່ງຂອງທີ່ເຈົ້າຂອງບໍ່ໄດ້ໃຫ້ ຄືວັດຖຸອຸປະກອນແຫ່ງຊັບຂອງບຸກຄົນອື່ນທີ່ຢູ່ໃນບ້ານ ຫຼືໃນປ່າກໍຕາມ ເປັນຜູ້ຖືເອົາສິ່ງຂອງທີ່ເຂົາບໍ່ໄດ້ໃຫ້ດ້ວຍອາການແຫ່ງຂີ້ລັກ
(໓) ເປັນຜູ້ມີປົກກະຕິປະພຶດຜິດໃນກາມ (ຄືປະພຶດຜິດ) ໃນຍິງ ຊຶ່ງມານດາຮັກສາ ບິດາຮັກສາ ອ້າຍນ້ອງຊາຍ ເອື້ອຍນ້ອງຍິງ ຫຼືຍາດຮັກສາ ອັນທັມຮັກສາ ເປັນຍິງທີ່ມີສາມີ ຍິງນັກໂທດ ໂດຍທີ່ສຸດແມ່ນແຕ່ຍິງ ອັນທີ່ເຂົາໝັ້ນໄວ້ (ດ້ວຍການຄ້ອງພວງມາໄລ) ເປັນຜູ້ປະພຶດຜິດຈາຮີດໃນຮູບແບບເຫລົ່ານັ້ນ

ຈຸນທະ ! ເຊັ່ນນີ້ແລ ເປັນຄວາມບໍ່ສະອາດທາງກາຍ ໓ ຢ່າງ.

ຈຸນທະ ! ຄວາມບໍ່ສະອາດທາງວາຈາ ມີ ໔ ຢ່າງ ເປັນແນວໃດໜໍ ? ຈຸນທະ ! ຄົນບາງຄົນໃນກໍລະນີນີ້
(໑) ເປັນຜູ້ມີປົກກະຕິເວົ້າຕົວະ ໄປສູ່ສະພາກໍດີ ໄປສູ່ບໍຣິສັດກໍດີ ໄປສູ່ທ່າມກາງໝູ່ຍາດກໍດີ ໄປສູ່ທ່າມກາງສາລາປະຊາຄົມກໍດີ ໄປສູ່ທ່າມກາງຣາຊະສະກຸນກໍດີ ອັນເຂົານໍາເອົາໄປເປັນພະຍານ ຖາມວ່າ “ບຸຣຸດຜູ້ຈະເລີນ ! ທ່ານຮູ້ແນວໃດ ທ່ານຈົ່ງກ່າວໄປເຊັ່ນນັ້ນ” ດັ່ງນີ້ ບຸຣຸດນັ້ນ ເມື່ອບໍ່ຮູ້ກໍກ່າວວ່າຮູ້ ເມື່ອຮູ້ກໍກ່າວວ່າບໍ່ຮູ້ ເມື່ອບໍ່ເຫັນກໍກ່າວວ່າເຫັນ ເມື່ອເຫັນກໍກ່າວວ່າບໍ່ເຫັນ ເພາະເຫດຕົນເອງ ເພາະເຫດຜູ້ອື່ນຫຼືເພາະເຫດເຫັນແກ່ອາມິດໃດໆ ກໍເປັນຜູ້ກ່າວຕົວະ ທັງທີ່ຮູ້ຢູ່
(໒) ເປັນຜູ້ມີວາຈາສໍ່ສຽດ ຄືຟັງຈາກຝ່າຍນີ້ແລ້ວໄປບອກຝ່າຍນັ້ນເພື່ອທໍາລາຍຝ່າຍນີ້ ຫຼືຟັງຈາກຝ່າຍນັ້ນແລ້ວມາບອກຝ່າຍນີ້ເພື່ອທໍາລາຍຝ່າຍນັ້ນ ເປັນຜູ້ເຮັດຄົນສາມັກຄີກັນໃຫ້ແຕກແຍກ ຫຼືເຮັດຄົນທີ່ແຕກແຍກກັນແລ້ວໃຫ້ແຕກແຍກກັນຫລາຍຂຶ້ນ ພໍໃຈ ຍິນດີ ເພີດເພີນໃນການແຕກແຍກກັນເປັນພວກ ເປັນຜູ້ກ່າວວາຈາທີ່ເຮັດໃຫ້ແຕກແຍກກັນເປັນພວກ


(໓) ເປັນຜູ້ມີວາຈາຫຍາບ ອັນເປັນວາຈາຫຍາບຄາຍ ແຂງກະດ້າງ ແສບເຜັດຕໍ່ຜູ້ອື່ນ ກະທົບກະເທືອນຜູ້ອື່ນ ແວດລ້ອມຢູ່ດ້ວຍຄວາມໂກດ ບໍ່ເປັນໄປເພື່ອສະມາທິ ເຂົາເປັນຜູ້ກ່າວວາຈາມີຮູບລັກສະນະເຊັ່ນນີ້
(໔) ເປັນຜູ້ມີວາຈາໂລເລ ຄືເປັນຜູ້ກ່າວບໍ່ຖືກກາລະ ບໍ່ກ່າວຕາມຈິງ ກ່າວບໍ່ອີງອັດຖະ ບໍ່ອີງທັມ ບໍ່ອີງວິນັຍ ເປັນຜູ້ກ່າວວາຈາບໍ່ມີທີ່ຕັ້ງອາໄສ ບໍ່ຖືກກາລະເທສະ ບໍ່ມີຈຸດຈົບ ບໍ່ປະກອບດ້ວຍປະໂຫຍດ

ຈຸນທະ ! ເຊັ່ນນີ້ແລ ຄືຄວາມບໍ່ສະອາດທາງວາຈາ ໔ ຢ່າງ.

ຈຸນທະ ! ຄວາມບໍ່ສະອາດທາງໃຈ ມີ ໓ ຢ່າງ ເປັນແນວໃດໜໍ ? ຈຸນທະ ! ຄົນບາງຄົນໃນກໍລະນີນີ້
(໑) ເປັນຜູ້ລົ້ນດ້ວຍອະພິດຊາ (ຄວາມໂລບເພັ່ງເລັງ) ເປັນຜູ້ໂລບເພັ່ງເລັງວັດຖຸອຸປະກອນແຫ່ງຊັບຂອງຜູ້ອື່ນວ່າ “ສິ່ງໃດເປັນຂອງຜູ້ອື່ນ ສິ່ງນັ້ນຈົ່ງເປັນຂອງເຮົາ” ດັ່ງນີ້
(໒) ເປັນຜູ້ມີຈິຕພະຍາບາດ ມີຄວາມດໍາຣິໃນໃຈເປັນໄປທາງປອງຮ້າຍ ວ່າ “ສັຕທັງຫລາຍເຫລົ່ານີ້ ຈົ່ງເດືອດຮ້ອນ ຈົ່ງແຕກທໍາລາຍ ຈົ່ງຂາດສູນ ຈົ່ງວິນາດ ຢ່າໄດ້ມີຢູ່ອີກເລີຍ” ດັ່ງນີ້ ເປັນຕົ້ນ

(໓) ເປັນຜູ້ມີຄວາມເຫັນຜິດ ມີທັດສະນະວິປະຣິດວ່າ “ທານທີ່ໃຫ້ແລ້ວ ບໍ່ມີ (ຜົນ) ຍັນທີ່ບູຊາແລ້ວ ບໍ່ມີ (ຜົນ) ການບູຊາ ທີ່ບູຊາແລ້ວ ບໍ່ມີ (ຜົນ) ຜົນວິບາກແຫ່ງກັມທີ່ສັຕເຮັດດີເຮັດຊົ່ວ ບໍ່ມີ ໂລກນີ້ ບໍ່ມີ ໂລກອື່ນ ບໍ່ມີ ມານດາ ບໍ່ມີ ບິດາ ບໍ່ມີ ໂອປະປາຕິກະສັຕ ບໍ່ມີ ສາມະນະພຣາມຜູ້ດໍາເນີນໄປໂດຍຖືກຕ້ອງ ປະຕິບັດໂດຍຖືກຕ້ອງ ເຖິງກັບເຮັດໃຫ້ແຈ້ງໂລກນີ້ແລະໂລກອື່ນ ດ້ວຍປັນຍາໂດຍຖືກຕ້ອງເອງ ແລ້ວປະກາດໃຫ້ຜູ້ອື່ນຮູ້ ກໍບໍ່ມີ” ດັ່ງນີ້
ຈຸນທະ ! ເຊັ່ນນີ້ແລ ເປັນຄວາມບໍ່ສະອາດທາງໃຈ ໓ ຢ່າງ.

ຈຸນທະ ! ເຫລົ່ານີ້ແລ ເອີ້ນວ່າ ອະກຸສົລກັມມະບົດສິບ.
ຈຸນທະ ! ອັນນຶ່ງ ເພາະມີການປະກອບດ້ວຍອະກຸສົລກັມມະບົດທັງສິບປະການເຫລົ່ານີ້ເປັນເຫດ ນະຣົກຍ່ອມປາກົດ ກໍາເນີດເດຣັດສານຍ່ອມປາກົດ ເປຕະວິສັຍຍ່ອມປາກົດ ຫລືວ່າ ທຸຄະຕິໃດໆ ແມ່ນແນວອື່ນອີກ ຍ່ອມມີ.

ພິກຂຸທັງຫຼາຍ ! ບຸກຄົນຍ່ອມປະກອບດ້ວຍທັມ ໑໐ ປະການນີ້ແລ ຍ່ອມເປັນເໝືອນບຸກຄົນຜູ້ຖືກນໍາໂຕໄປເກັບໄວ້ໃນນະຣົກ.

- ບາລີ ທສກ. ອັງ. ໒໔/໒໘໕-໒໘໗, ໓໐໕/໑໖໕, ໑໘໙.