ເຫດແຫ່ງການດໍາຣົງຢູ່ຂອງຊີວິດ

ອານົນທ໌ ! ກໍຄໍາວ່າ “ນາມຮູບມີ ເພາະປັດຈັຍ ຄື ວິນຍານ” ດັ່ງນີ້ ເຊັ່ນນີ້ແລ ເປັນຄໍາທີ່ເຮົາກ່າວແລ້ວ.

ອານົນທ໌ ! ຄວາມຂໍ້ນີ້ ເຈົ້າຕ້ອງຮູ້ຄໍາອະທິບາຍ ໂດຍປະຣິຍາຍດັ່ງຕໍ່ໄປນີ້ ທີ່ຖືກກັບຫົວຂໍ້ທີ່ເຮົາກ່າວໄວ້ແລ້ວວ່າ :-

“ນາມຮູບມີ ເພາະປັດຈັຍຄື ວິນຍານ”.

ອານົນທ໌ ! ຖ້າຫາກວ່າວິນຍານບໍ່ກ້າວລົງໃນທ້ອງແຫ່ງມານດາແລ້ວນັ້ນ ນາມຮູບປຸງແຕ່ງຂຶ້ນມາໃນທ້ອງແຫ່ງມານດາໄດ້ບໍ່ ?
ຂໍ້ນັ້ນ ຫາບໍ່ໄດ້ຂ້ານ້ອຍ !

ອານົນທ໌ ! ຖ້າຫາກວ່າວິນຍານກ້າວລົງໃນທ້ອງແຫ່ງມານດາແລ້ວ ຈະສະຫຼາຍລົງເສຍແລ້ວນັ້ນ ນາມຮູບຈະບັງເກີດຂຶ້ນເພື່ອຄວາມເປັນເຊັ່ນນີ້ໄດ້ບໍ່ ?
ຂໍ້ນັ້ນເປັນໄປບໍ່ໄດ້ ຂ້ານ້ອຍ !

ອານົນທ໌ ! ຖ້າຫາກວ່າວິນຍານຂອງເດັກແດງ ທີ່ເປັນຊາຍກໍຕາມ ເປັນຍິງກໍຕາມ ຈະຂາດລົງເສຍແລ້ວນັ້ນ ນາມຮູບຈະເຖິງຊຶ່ງຄວາມຈະເລີນງອກງມ ຄວາມໄພບູນຢູ່ອີກບໍ່ ?
ຂໍ້ນັ້ນ ຫາບໍ່ໄດ້ຂ້ານ້ອຍ !

ອານົນທ໌ ! ເພາະເຫດນັ້ນ ໃນເລື່ອງນີ້ ນັ້ນແຫຼະຄືເຫດ ນັ້ນແຫຼະຄືນິທານ ນັ້ນແຫຼະຄືສະມຸທັຍ ນັ້ນແຫຼະຄືປັດຈັຍຂອງນາມຮູບ ນັ້ນຄືວິນຍານ.

ອານົນທ໌ ! ກໍຄໍານີ້ວ່າ “ວິນຍານມີ ເພາະປັດຈັຍຄື ນາມຮູບ” ດັ່ງນີ້ ເຊັ່ນນີ້ແລ ເປັນຄໍາທີ່ເຮົາກ່າວແລ້ວ.

ອານົນທ໌ ! ຄວາມຂໍ້ນີ້ ເຈົ້າຕ້ອງຮູ້ຄໍາອະທິບາຍ ໂດຍປະຣິຍາຍດັ່ງຕໍ່ໄປນີ້ ທີ່ຖືກກັບຫົວຂໍ້ທີ່ເຮົາກ່າວໄວ້ແລ້ວວ່າ :-

“ວິນຍານມີ ເພາະປັດຈັຍຄື ນາມຮູບ”.

ອານົນທ໌ ! ຖ້າຫາກວ່າວິນຍານ ຈະບໍ່ໄດ້ມີທີ່ຕັ້ງທີ່ອາໄສໃນນາມຮູບແລ້ວນັ້ນ ຄວາມເກີດຂຶ້ນພ້ອມແຫ່ງທຸກຂ໌ ຄື ຊາດ ຊະຣາ ມໍຣະນະ ຕໍ່ໄປ ຈະມີຂຶ້ນມາໃຫ້ເຫັນໄດ້ບໍ່?
ຂໍ້ນັ້ນ ຫາບໍ່ໄດ້ຂ້ານ້ອຍ !


ອານົນທ໌ ! ເພາະເຫດນັ້ນ ໃນເລື່ອງນີ້ ນັ້ນແຫຼະຄືເຫດ ນັ້ນແຫຼະຄືນິທານ ນັ້ນແຫຼະຄືສະມຸທັຍ ນັ້ນຄືປັດຈັຍຂອງ ວິນຍານ ນັ້ນຄືນາມຮູບ.
ອານົນທ໌ !
ດ້ວຍເຫດພຽງເທົ່ານີ້
ສັຕໂລກ ຈຶ່ງເກີດແດ່ ຈຶ່ງແກ່ແດ່
ຈຶ່ງຕາຍແດ່ ຈຶ່ງຈຸຕິແດ່ ຈຶ່ງອຸບັດແດ່
ຮູບແບບແຫ່ງການເອີ້ນ (ອະດິວະຈະນະ) ກໍມີພຽງເທົ່ານີ້
ຮູບແບບແຫ່ງການເວົ້າຈາ (ນິຣຸຕຕິ) ກໍມີພຽງເທົ່ານີ້
ຮູບແບບແຫ່ງການບັນຍັດ (ປັນຍັຕຕິ) ກໍມີພຽງເທົ່ານີ້
ເລື່ອງທີ່ຈະຕ້ອງຮູ້ດ້ວຍປັນຍາ (ປັນຍາວະຈະຣະ) ກໍມີ
ພຽງເທົ່ານີ້
ຄວາມວຽນວ່າຍໃນວັຕຕະ ກໍມີພຽງເທົ່ານີ້
ນາມຮູບພ້ອມທັງວິນຍານຕັ້ງຢູ່
ເພື່ອການບັນຍັດຊຶ່ງຄວາມເປັນເຊັ່ນນີ້.
(ຂອງນາມຮູບກັບວິນຍານ ນັ້ນເອງ).

- ບາລີ ມຫາ. ທີ. ໑໐/໗໔/໖໐.