ທັມທັງປວງມີສະຕິເປັນໃຫຍ່

ພິກຂຸທັງຫລາຍ ຖ້າພວກອັນຍະເດຍຣະຖີປະຣິພາຊົກຖາມຢ່າງນີ້ວ່າ: ອາວຸໂສທັງຫລາຍ ທັມທັງປວງມີອັນໃດເປັນມູລ ມີອັນໃດເປັນແດນເກີດ ມີອັນໃດເປັນເຫດເກີດ ມີອັນໃດເປັນທີ່ປະຊຸມລົງ ມີອັນໃດເປັນປະມຸກ ມີອັນໃດເປັນໃຫຍ່ ມີອັນໃດເປັນເລີດ ມີອັນໃດເປັນແກ່ນ ມີອັນໃດເປັນທີ່ຢັ່ງລົງ ມີອັນໃດເປັນທີ່ສຸດ?

ພວກເຈົ້າທັງຫລາຍຖືກຖາມຢ່າງນີ້ແລ້ວ ຈະພະຍາກອນແກ່ພວກອັນຍະເດຍຣະຖີປະຣິພາຊົກເຫລົ່ານັ້ນວ່າແນວໃດ?

ພິກຂຸເຫລົ່ານັ້ນກຣາບທູນວ່າ:

ຂ້າແຕ່ພຣະອົງຄ໌ຜູ້ຈະເຣີນ ທັມຂອງພວກຂ້ານ້ອຍທັງຫລາຍມີພຣະຜູ້ມີພຣະພາກເຈົ້າເປັນມູລ ມີພຣະຜູ້ມີພຣະພາກເຈົ້າເປັນຜູ້ນຳ ມີພຣະຜູ້ມີພຣະພາກເຈົ້າເປັນທີ່ເພິ່ງອາໄສ ຂໍປະທານໂອກາດ ຂໍເນື້ອຄວາມແຫ່ງພາສິຕນີ້ຈົ່ງແຈ່ມແຈ້ງກັບພຣະຜູ້ມີພຣະພາກເຈົ້າເຖີດ ພິກຂຸທັງຫລາຍໄດ້ຟັງຕໍ່ພຣະຜູ້ມີພຣະພາກແລ້ວຈັກຊົງຈຳໄວ້.

ພິກຂຸທັງຫລາຍ ຖ້າເຊັ່ນນັ້ນພວກເຈົ້າທັງຫລາຍຈົ່ງຟັງ ຈົ່ງໃສ່ໃຈໃຫ້ດີເຮົາຈະກ່າວ.

ພິກຂຸທັງຫລາຍ ຖ້າພວກອັນຍະເດຍຣະຖີປະຣິພາຊົກຖາມຢ່າງນີ້ວ່າ: ອາວຸໂສທັງຫລາຍ ທັມທັງປວງມີອັນໃດເປັນມູລ ມີອັນໃດເປັນແດນເກີດ ມີອັນໃດເປັນເຫດເກີດ ມີອັນໃດເປັນທີ່ປະຊຸມລົງ ມີອັນໃດເປັນປະມຸກ ມີອັນໃດເປັນໃຫຍ່ ມີອັນໃດເປັນເລີດ ມີອັນໃດເປັນແກ່ນ ມີອັນໃດເປັນທີ່ຢັ່ງລົງ ມີອັນໃດເປັນທີ່ສຸດ?

ພວກເຈົ້າທັງຫລາຍຖືກຖາມຢ່າງນີ້ແລ້ວ ຈົ່ງພະຍາກອນແກ່ພວກອັນຍະເດຍຣະຖີປະຣິພາຊົກເຫລົ່ານັ້ນຢ່າງນີ້ວ່າ:

ອາວຸໂສທັງຫລາຍ ທັມທັງປວງມີສັນທະເປັນມູລ, ມີມະນະສິກາຣເປັນແດນເກີດ, ມີຜັສສະເປັນເຫດເກີດ, ມີເວທະນາເປັນທີ່ປະຊຸມລົງ, ມີສະມາທິເປັນປະມຸກ, ມີສະຕິເປັນໃຫຍ່, ມີປັນຍາເປັນເລີດ, ມີວິມຸຕເປັນແກ່ນ, ມີອະມະຕະເປັນທີ່ຢັ່ງລົງ, ມີນິພພານເປັນທີ່ສຸດ.

ພິກຂຸທັງຫລາຍ ພວກເຈົ້າທັງຫລາຍຖືກຖາມຢ່າງນີ້ແລ້ວ ຈົ່ງພະຍາກອນແກ່ພວກອັນຍະເດຍຣະຖີປະຣິພາຊົກເຫລົ່ານັ້ນຢ່າງນີ້ແລ.

ອັງຄຸຕຕະຣະນິກາຍ ທະສະກະ-ເອກາທະສະກະນິບາຕ ໒໔/໙໗/໕໘.

ທັມທັງປວງມີສະຕິເປັນໃຫຍ່