ຄົນມີກິເລດຕົກນະຣົກທັງໝົດທຸກຄົນ ແທ້ບໍ່ ? (ບຸກຄົນທີ່ມີເຊື້ອເຫຼືອ 9 ຈຳພວກ)

ເຊົ້າມື້ໜຶ່ງ ທ່ານພຣະສາຣີບຸຕຄອງຈີວອນ ຖືບາຕ ເຂົ້າໄປບິນດະບາຕໃນນະຄອນສາວັດຖີ ທ່ານເຫັນວ່າເວລາຍັງເຊົ້າເກີນໄປສຳລັບການບິນດະບາຕ ຈຶ່ງແວະເຂົ້າໄປໃນອາຣາມຂອງພວກປະຣິບພາຊົກລັດທິອື່ນໄດ້ທັກທາຍປາໄສກັນຕາມທັມນຽມແລ້ວ ນັ່ງລົງ ນະ ສ່ວນຂ້າງໜຶ່ງ. ກໍໃນເວລານັ້ນແລ ພວກປະຣິບພາຊົກທັງຫຼາຍນັ້ນ ກຳລັງຍົກຂໍ້ຄວາມຂຶ້ນກ່າວໂຕ້ຖຽງກັນຢູ່ ເຖິງເລື່ອງບຸກຄົນໃດ ໃຜກໍຕາມ ທີ່ຍັງມີເຊື້ອເຫຼືອ ຖ້າຕາຍແລ້ວ ຍ່ອມບໍ່ພົ້ນເສຍຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ ໄປໄດ້ເລີຍຈັກຄົນດຽວ ດັ່ງນີ້. ທ່ານພຣະສາຣີບຸຕບໍ່ສະແດງວ່າເຫັນດ້ວຍ ແລະບໍ່ຄັດຄ້ານ ຂໍ້ຄວາມຂອງປະຣິບພາຊົກເຫຼົ່ານັ້ນ, ລຸກຈາກບ່ອນນັ່ງໄປ ໂດຍຄິດວ່າທູນຖວາຍພຣະຜູ້ມີພຣະພາຄເຈົ້າແລ້ວຈັກໄດ້ຮູ້ຄວາມຂໍ້ນີ້. ຄັນກັບຈາກບິນດະບາຕ ພາຍຫຼັງອາຫາຣແລ້ວ ຈຶ່ງເຂົ້າໄປເຝົ້າພຣະຜູ້ມີພຣະພາຄເຈົ້າ ກາບທູນເຖິງເລື່ອງແລ້ວທີ່ເກິດຂຶ້ນໃນຕອນເຊົ້າທຸກປະການ. ພຣະຜູ້ມີພຣະພາຄເຈົ້າຈຶ່ງຕຣັສວ່າ : -
ສາຣີບຸຕ ! ພວກປະຣິບພາຊົກລັດທິອື່ນ ຍັງອ່ອນຄວາມຮູ້ ບໍ່ສະຫລາດ ຈັກຮູ້ໄດ້ຢ່າງໃດກັນວ່າ ໃຜມີເຊື້ອເຫຼືອ ໃຜບໍ່ມີເຊື້ອເຫຼືອ.
ສາຣີບຸຕ ! ບຸກຄົນທີ່ມີເຊື້ອ (ກິເລສ) ເຫຼືອ ໙ ຈຳພວກ ດັ່ງທີ່ຈະກ່າວຕໍ່ໄປນີ້ ແມ່ນຕາຍໄປ ກໍພົ້ນແລ້ວຈາກນະຣົກ ພົ້ນແລ້ວຈາກກຳເນີດເດຣັຈສານ ພົ້ນແລ້ວຈາກວິສັຍແຫ່ງເປຕ ພົ້ນແລ້ວຈາກອະບາຍ ທຸຄະຕິ ວິນິບາຕ.

ບຸກຄົນເກົ້າຈຳພວກເຫຼົ່ານັ້ນ ເປັນແນວໃດໜໍ ?
ເກົ້າຈຳພວກ ຄື: -

(໑) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ເຮັດໄດ້ເຕັມທີ່ໃນສ່ວນສະມາທິ ແຕ່ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໕ ຢ່າງໃນເບື້ອງຕົ້ນໃຫ້ດັບສິ້ນໄປ, ບຸກຄົນນັ້ນເປັນ ອະນາຄາມີຜູ້ຈະປະຣິນິບພານໃນລະຫວ່າງອາຍຸຍັງບໍ່ທັນເຖິງເຄິ່ງ.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໑ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໒) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ເຮັດໄດ້ເຕັມທີ່ໃນສ່ວນສະມາທິ ແຕ່ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໕ ຢ່າງໃນເບື້ອງຕົ້ນໃຫ້ດັບສິ້ນໄປ, ບຸກຄົນນັ້ນເປັນ ອະນາຄາມີຜູ້ຈະປະຣິນິບພານເມື່ອອາຍຸພົ້ນເຄິ່ງແລ້ວໃກ້ເຖິງທີ່ສຸດ.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໒ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໓) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ເຮັດໄດ້ເຕັມທີ່ໃນສ່ວນສະມາທິ ແຕ່ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໕ ຢ່າງໃນເບື້ອງຕົ້ນໃຫ້ດັບສິ້ນໄປ, ບຸກຄົນນັ້ນເປັນ ອະນາຄາມີຜູ້ຈະປະຣິນິບພານໂດຍບໍ່ຕ້ອງໃຊ້ຄວາມພຽນເຫື່ອແຮງ.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໓ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໔) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ເຮັດໄດ້ເຕັມທີ່ໃນສ່ວນສະມາທິ ແຕ່ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໕ ຢ່າງໃນເບື້ອງຕົ້ນໃຫ້ດັບສິ້ນໄປ, ບຸກຄົນນັ້ນເປັນ ອະນາຄາມີຜູ້ຈະປະຣິນິບພານໂດຍຕ້ອງໃຊ້ຄວາມພຽນເຫື່ອແຮງ.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໔ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໕) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ ເຮັດໄດ້ເຕັມທີ່ໃນສ່ວນສີລ ເຮັດໄດ້ເຕັມທີ່ໃນສ່ວນສະມາທິ ແຕ່ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໕ ຢ່າງໃນເບື້ອງຕົ້ນໃຫ້ດັບສິ້ນໄປ, ບຸກຄົນນັ້ນເປັນ ອະນາຄາມີຜູ້ມີກະແສໃນເບື້ອງເທິງໄປເຖິງອະກະນິຕຖະພົບ.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໕ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໖) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ແຕ່ເຮັດໄດ້ພໍປະມານໃນສ່ວນສະມາທິ ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໓ ຢ່າງໃຫ້ດັບສິ້ນໄປ, ແລະເພາະມີຣາຄະ ໂທສະ ໂມຫະ ເບົາບາງໜ້ອຍລົງ, ເປັນ ສະກະທາຄາມີ ຍັງຈະມາສູ່ເທວະໂລກນີ້ອີກເທື່ອດຽວເທົ່ານັ້ນ ແລ້ວເຮັດທີ່ສຸດແຫ່ງທຸກຂ໌ໄດ້.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ່ ໖ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໗) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ ເຮັດໄດ້ເຕັມທີ່ໃນສ່ວນສີລ ແຕ່ເຮັດໄດ້ພໍປະມານໃນສ່ວນສະມາທິ ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໓ ຢ່າງໃຫ້ດັບສິ້ນໄປ, ບຸກຄົນນັ້ນເປັນ ໂສດາບັນຜູ້ມີພືດເທື່ອດຽວ ຄື ຈັກເກີດໃນພົບແຫ່ງມະນຸສອີກເທື່ອດຽວເທົ່ານັ້ນ ແລ້ວເຮັດທີ່ສຸດແຫ່ງທຸກຂ໌ໄດ້.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໗ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໘) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ ເຮັດໄດ້ເຕັມທີ່ໃນສ່ວນສີລ ແຕ່ເຮັດໄດ້ພໍປະມານໃນສ່ວນສະມາທິ ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໓ ຢ່າງໃຫ້ດັບສິ້ນໄປ, ບຸກຄົນຜູ້ນັ້ນເປັນ ໂສດາບັນຜູ້ຕ້ອງທ່ອງທ່ຽວໄປສູ່ສະກຸລອີກ ໒ ຫຼື ໓ ເທື່ອ ແລ້ວເຮັດທີ່ສຸດແຫ່ງທຸກຂ໌ໄດ້.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໘ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.

(໙) ສາຣີບຸຕ ! ບຸກຄົນບາງຄົນໃນກໍລະນີນີ້ ເປັນຜູ້ເຮັດໄດ້ເຕັມທີ່ໃນສ່ວນສີລ ແຕ່ເຮັດໄດ້ພໍປະມານໃນສ່ວນສະມາທິ ເຮັດໄດ້ພໍປະມານໃນສ່ວນປັນຍາ. ເພາະເຮັດສັງໂຍຊນ໌ ໓ ຢ່າງໃຫ້ດັບສິ້ນໄປ, ບຸກຄົນນັ້ນເປັນ ໂສດາບັນຜູ້ຕ້ອງທ່ຽວໄປໃນເທວະດາແລະມະນຸສອີກ ໗ ເທື່ອເປັນຢ່າງຫຼາຍ ແລ້ວເຮັດທີ່ສຸດແຫ່ງທຸກຂ໌ໄດ້.
ສາຣີບຸຕ ! ນີ້ເປັນບຸກຄົນຜູ້ມີເຊື້ອເຫຼືອພວກທີ ໙ ທີ່ເມື່ອຕາຍ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.
ສາຣີບຸຕ ! ປະຣິບພາຊົກລັດທິອື່ນ ຍັງອ່ອນຄວາມຮູ້ ບໍ່ສະຫຼາດ ຈັກຮູ້ໄດ້ຢ່າງໃດກັນວ່າຜູ້ໃດມີເຊື້ອເຫຼືອ ໃຜບໍ່ມີເຊື້ອເຫຼືອ. ສາຣີບຸຕ ! ບຸກຄົນເຫຼົ່ານີ້ແລ ທີ່ມີເຊື້ອເຫຼືອ ໙ ຈຳພວກ ເມື່ອຕາຍໄປ ກໍພົ້ນແລ້ວຈາກນະຣົກ ຈາກກຳເນີດເດຣັຈສານ ຈາກວິສັຍແຫ່ງເປຕ ຈາກອະບາຍ ທຸຄະຕິ ວິນິບາຕ.
ສາຣີບຸຕ ! ທັມປະຣິຍາຍຂໍ້ນີ້ ຍັງບໍ່ເຄີຍສະແດງໃຫ້ປາກົດ ແກ່ໝູ່ພິກຂຸ ພິກຂຸນີ ອຸບາສົກ ອຸບາສິກາທັງຫຼາຍມາແຕ່ກາລກ່ອນ.
ຂໍ້ນັ້ນເພາະເຫຕໃດໜໍ ?
ເພາະເຮົາເຫັນວ່າ ຖ້າເຂົາເຫຼົ່ານັ້ນໄດ້ຟັງທັມປະຣິຍາຍຂໍ້ນີ້ແລ້ວ ຈັກພາກັນເກີດຄວາມປະມາດ;
ອັນໜຶ່ງໜໍ ທັມປະຣິຍາຍເຊັ່ນນີ້ ເປັນທັມປະຣິຍາຍ ທີ່ເຮົາກ່າວ ຕໍ່ເມື່ອຖືກຖາມເຈາະຈົງເທົ່ານັ້ນ; ດັ່ງນີ້ ແລ.

- ບາລີ ນວກ. ອັງ. ໒໓/໓໙໑-໓໙໒/໒໑໖.