ອາຍຸນະຣົກ

ຂ້າແຕ່ພຣະອົງຜູ້ຈະເຣີນ ! ພຣະສາຣີບຸຕແລະພຣະໂມກຄັນລານະ ເປັນຜູ້ມີຄວາມປາຖນາອັນຕໍ່າຊາມ ຕົກຢູ່ໃນອໍານາດແຫ່ງຄວາມປາຖນາອັນຕໍ່າຊາມ ຂ້ານ້ອຍ !

ໂກກາລິກະ ເຈົ້າຢ່າໄດ້ກ່າວແນວນີ້ເລີຍ.

ໂກກາລິກະ ເຈົ້າຢ່າໄດ້ກ່າວແນວນີ້ ເຈົ້າຈົ່ງຍັງຈິຕໃຫ້ເຫຼື້ອມໃສໃນສາຣີບຸຕແລະໂມກຄັນລານະເຖີ້ນ ສາຣີບຸຕແລະໂມກຄັນລານະມີສີລເປັນທີ່ຮັກ.

ແມ່ນວ່າຄັ້ງທີ ໒ ໂກກາລິກະພິກຂຸໄດ້ຂາບທູນອີກ ພຣະຜູ້ມີພຣະພາກເຈົ້າຕຣັດຫ້າມ
ແມ່ນວ່າຄັ້ງທີ ໓ ໂກກາລິກະພິກຂຸໄດ້ຂາບທູນອີກ ພຣະຜູ້ມີພຣະພາກເຈົ້າຕຣັດຫ້າມ
ລໍາດັບນັ້ນແລ ໂກກາລິກະພິກຂຸ ລຸກຈາກອາສະນະ ຖວາຍນອບນ້ອມພຣະຜູ້ມີພຣະພາກເຈົ້າ ເຮັດປະທັກຂິນາແລ້ວຫຼີກຜ່າຍໄປ...

ຄັນພໍຣາຕຣີຜ່ານໄປ ພຣະຜູ້ມີພຣະພາກຕຣັດກັບພິກຂຸທັງຫຼາຍວ່າ :

ພິກຂຸທັງຫຼາຍ ! ມື້ຄືນນີ້ ເມື່ອປະຖົມຍາມຜ່ານໄປແລ້ວ ທ້າວສະຫັມບໍດີພຣົມ ມີລັດສະໝີອັນງາມຍິ່ງ ເຮັດວິຫານເຊຕະວັນທັງໝົດ ໃຫ້ສະຫວ່າງແຈ້ງ ເຂົ້າມາຫາເຮົາຮອດບ່ອນຢູ່ ອະພິວາດແລ້ວຢືນຢູ່ທີ່ຄວນສ່ວນເບື້ອງໜຶ່ງ ຄັນແລ້ວໄດ້ກ່າວກັບເຮົາວ່າ “ຂ້າແຕ່ພຣະອົງຜູ້ຈະເຣີນ ! ໂກກາລິກະພິກຂຸມໍຣະນະພາບແລ້ວ ອຸບັດໃນປະທຸມະນະຣົກ ເພາະຈິຕຄິດອາຄາດ ໃນພຣະສາຣີບຸຕແລະພຣະໂມກຄັນລານະ” ທ້າວສະຫັມບໍດີພຣົມ ຄັນກ່າວດັ່ງນີ້ແລ້ວ ເຮັດປະທັກຂິນາແລ້ວ ໄດ້້ອັນຕະທານຫາຍໄປ ໃນບ່ອນນັ້ນເອງ.
ຂ້າແຕ່ພຣະອົງຜູ້ຈະເຣີນ ! ປະມານອາຍຸຂັຍໃນປະທຸມມະນະຣົກ ດົນສໍ່າໃດ ຂ້ານ້ອຍ

ພິກຂຸທັງຫຼາຍ ! ປະມານອາຍຸຂັຍໃນປະທຸມມະນະຣົກດົນແທ້ ການນັບປະມານອາຍຸຂັຍ ໃນປະທຸມມະນະຣົກນັ້ນວ່າ ເທົ່ານີ້ປີ ເທົ່ານີ້ຮ້ອຍປີ ເທົ່ານີ້ພັນປີ ຫຼືວ່າເທົ່ານີ້ແສນປີ ບໍ່ແມ່ນເຮັດໄດ້້ງ່າຍ.
ຂ້າແຕ່ພຣະອົງຜູ້ຈະເຣີນ ! ກໍພຣະອົງພໍສາມາດ ຈະຊົງເຮັດການປຽບທຽບໄດ້ຫຼືບໍ່ ຂ້ານ້ອຍ !

ພິກຂຸທັງຫຼາຍ ! ອາດປຽບທຽບໄດ້.

ພິກຂຸທັງຫຼາຍ ! ປຽບເໝືອນກວຽນ ທີ່ບັນທຸກງາຂອງຊາວໂກສົນ ມີອັດຕາ ໒໐ ຂາຣີ ເມື່ອຜ່ານໄປທຸກແສນປີ ບຸຣຸດຍ່ອມຢິບໝາກງາຂຶ້ນຈາກກວຽນນັ້ນ ອອກໜຶ່ງເມັດ.

ພິກຂຸທັງຫຼາຍ ! ກວຽນທີ່ບັນທຸກງາຂອງຊາວໂກສົນ ມີອັດຕາ ໒໐ ຂາຣີນັ້ນ ຈະຍ່ອມເຖິງຄວາມສ້ຽງໄປ ໝົດໄປໂດຍລໍາດັບ ນີ້ຍັງໄວເສຍກ່ອນ ສ່ວນ ໑ ອັບພຸທະນະຣົກຍັງບໍໍ່ທັນເຖິງຄວາມສ້ຽງໄປ ໝົດໄປໄດ້ເລີຍ.
ພິກຂຸທັງຫຼາຍ !
໒໐ ອັບພຸທະນະຣົກ ເປັນ ໑ ນິຣັບພຸທະນະຣົກ
໒໐ ນິຣັບພຸທະນະຣົກ ເປັນ ໑ ອັບພະນະຣົກ
໒໐ ອັບພະນະຣົກ ເປັນ ໑ ອະຫະຫະນະຣົກ
໒໐ ອະຫະຫະນະຣົກ ເປັນ ໑ ອະຕະຕະນະຣົກ
໒໐ ອະຕະຕະນະຣົກ ເປັນ ໑ ກຸມຸທະນະຣົກ
໒໐ ກຸມຸທະນະຣົກ ເປັນ ໑ ໂສຄັນດິກະນະຣົກ
໒໐ ໂສຄັນດິກະນະຣົກ ເປັນ ໑ ອຸປະລະກະນະຣົກ
໒໐ ອຸປະລະກະນະຣົກ ເປັນ ໑ ປຸນດະຣີກະນະຣົກ
໒໐ ປຸນດະຣີກະຣົກ ເປັນ ໑ ປະທຸມະນະຣົກ
ເຊັ່ນນີ້ ກໍໂກກາລິກະພິກຂຸ ອຸບັດໃນປະທຸມະນະຣົກ ເພາະຈິຕຄິດອາຄາດ ໃນສາຣີບຸຕແລະໂມກຄັນລານະ.

(ຄາຖາຜະນວກທ້າຍພຣະສູຕ)
ກໍວາຈາຫຍາບເຊັ່ນກັບຂວານ ເກີດໃນປາກຂອງບຸຣຸດແລ້ວ
ເປັນເຫດຕັດຮອນຕົນເອງ ຂອງບຸຣຸດຜູ້ເປັນພາລ
ຜູ້ກ່າວຄໍາທຸບພາສິຕ
ຜູ້ໃດສັນລະເສີນຄົນທີ່ຄວນນິນທາ
ຫຼືນິນທາຄົນທີ່ຄວນສັນລະເສີນ
ຜູ້ນັ້ນຍ່ອມກໍ່ໂທດເພາະປາກ
ຍ່ອມບໍ່ໄດ້ຄວາມສຸຂເພາະໂທດນັ້ນ
ການບໍ່ແພ້(ເສຍ)ດ້ວຍຊັບເພາະຫຼິ້ນການພະນັນ
ເປັນໂທດພຽງເລັກນ້ອຍ
ໂທດຂອງຜູ້ທີ່ຍັງໃຈໃຫ້ປອງຮ້າຍໃນທ່ານຜູ້ປະຕິບັດດີ
ນີ້ແລເປັນໂທດຫຼາຍກວ່າ
ບຸກຄົນຕັ້ງວາຈາແລະໃຈອັນເປັນບາບໄວ້ແລ້ວ
ເປັນຜູ້ຕິຕຽນພຣະອະຣິຍະເຈົ້າ
ຍ່ອມເຂົ້າເຖິງນະຣົກຕະຫຼອດກາລ
ປະມານດ້ວຍການນັບປີ
໑໓໖,໐໐໐ ນິຣັບພຸທະ ແລະ ໕ ອັບພຸທະ

- ບາລີ ທສກ. ອັງ. ໒໔/໑໘໑/໘໙.