ພຣະໂສດາບັນກັບພຣະອະຣະຫັນຕ່າງກັນ ໃນການເຫັນທັມ (ອີກໃນຍະໜຶ່ງ)

ພິກຂຸທັງຫຼາຍ ! ອິນຊີຫົກເຫຼົ່ານີ້ ມີຢູ່.
ຫົກເຫຼົ່າ ແນວໃດໜໍ ? ຫົກເຫຼົ່າ ຄື: -
ຈັກຂຸນຊີ ໂສຕິນຊີ
ຄານິນຊີ ຊິວຫິນຊີ
ກາຍິນຊີ ມະນິນຊີ.
ພິກຂຸທັງຫຼາຍ ! ເມື່ອໃດ ອະຣິຍະສາວົກ ຮູ້ແຈ່ມແຈ້ງຕາມເປັນຈິງ ຊຶ່ງຄວາມເກີດຂຶ້ນ, ຊຶ່ງຄວາມຕັ້ງຢູ່ບໍ່ໄດ້, ຊຶ່ງຣົສຍົວະຍວນ, ຊຶ່ງໂທດອັນຕ່ຳຊາມ ແລະຊຶ່ງອຸບາຍເປັນເຄື່ອງສະລັດອອກ ແຫ່ງອິນຊີຫົກເຫຼົ່ານີ້;
ພິກຂຸທັງຫຼາຍ ! ອະຣິຍະສາວົກນີ້ ເຮົາເອີ້ນວ່າ ເປັນໂສດາບັນ ມີອັນບໍ່ຕົກຕ່ຳເປັນທຳມະດາ ເປັນຜູ້ທ່ຽງແທ້ຕໍ່ພຣະນິບພານ ຈັກຕຣັສຮູ້ພ້ອມໃນເບື້ອງໜ້າ.
ພິກຂຸທັງຫຼາຍ ! ອິນຊີຫົກເຫຼົ່ານີ້ ມີຢູ່.
ຫົກເຫຼົ່າ ແນວໃດໜໍ ? ຫົກເຫຼົ່າ ຄື: -

ຈັກຂຸນຊີ ໂສຕິນຊີ ຄານິນຊີ
ຊິວຫິນຊີ ກາຍິນຊີ ມະນິນຊີ.

ພິກຂຸທັງຫຼາຍ ! ເມື່ອໃດພິກຂຸ ຮູ້ແຈ່ມແຈ້ງຕາມເປັນຈິງ ຊຶ່ງຄວາມເກີດຂຶ້ນ, ຊຶ່ງຄວາມຕັ້ງຢູ່ບໍ່ໄດ້, ຊຶ່ງຣົສຍົວະຍວນ, ຊຶ່ງໂທດອັນຕ່ຳຊາມ ແລະຊຶ່ງອຸບາຍເປັນເຄື່ອງສະລັດອອກ ແຫ່ງອິນຊີຫົກເຫຼົ່ານີ້ ດັ່ງນີ້ ແລະ ເປັນຜູ້ຫຼຸດພົ້ນແລ້ວ ເພາະບໍ່ມີຄວາມຢຶດໝັ້ນ.
ພິກຂຸທັງຫຼາຍ ! ພິກຂຸນີ້ເຮົາເອີ້ນວ່າ ເປັນພຣະອະຣະຫັນຕ໌ ຜູ້ມີອາສະວະດັບສິ້ນແລ້ວ ຢູ່ຈົບພຣົມມະຈັນແລ້ວ ເຮັດກິຈທີ່ຄວນເຮັດສຳເລັດແລ້ວ ມີພາຣະອັນປົງລົງແລ້ວ ມີປະໂຍຊນ໌ຕົນອັນຕາມເຖິງແລ້ວ ມີສັງໂຍຊນ໌ໃນພົບສິ້ນໄປຮອບແລ້ວ ເປັນຜູ້ຫຼຸດພົ້ນແລ້ວເພາະຮູ້ໂດຍຊອບ ດັ່ງນີ້ ແລ.
(ສູຕຂ້າງເທິງນີ້ຊົງສະແດງອິນຊີໂດຍອາຍະຕະນະພາຍໃນຫົກ; ຍັງມີສູຕອື່ນ (໑໙/໒໗໕/໙໑໔-໙໑໘) ຊົງສະແດງອິນຊີໂດຍເວທະນາຫ້າ ຄື ສຸຂິນຊີ ທຸກຂິນຊີ ໂສມະນັສສິນຊີ ໂທມະນັສສິນຊີ ອຸເປກຂິນຊີ, ດັ່ງນີ້ກໍມີ).

- ບາລີ ມຫາວາຣ. ສັງ. ໑໙/໒໗໑-໒໗໒/໙໐໒-໙໐໓.