ຄວາມສັນໂດດ

ອາວຸໂສ! ຂໍ້ນີ້ກໍສັນນັ້ນ ສີລວິສຸທທິເປັນປະໂຍຊນ໌ແກ່ຈິຕຕະວິສຸທທິ, ຈິຕຕະວິສຸທທິເປັນປະໂຍຊນ໌ແກ່ທິຕຖິວິສຸທທິ, ທິຕຖິວິສຸທທິເປັນປະໂຍຊນ໌ແກ່ກັງຂາວິຕະຣະນະວິສຸທທິ, ກັງຂາວິຕະຣະນະວິສຸທທິເປັນປະໂຍຊນ໌ແກ່ມັຄຄາມັຄຄະຍານທັສສະນະວິສຸທທິ, ມັຄຄາມັຄຄະຍານທັສສະນະວິສຸທທິເປັນປະໂຍຊນ໌ແກ່ປະຕິປະທາຍານທັສສະນະວິສຸທທິ, ປະຕິປະທາຍານທັສສະນະວິສຸທທິເປັນປະໂຍຊນ໌ແກ່ຍານທັສສະນະວິສຸທທິ, ຍານທັສສະນະວິສຸທທິເປັນປະໂຍຊນ໌ແກ່ອະນຸປາທາປະຣິນິພພານ.

ອາວຸໂສ! ຂ້ານ້ອຍປະພຶຕພຣົມມະຈັນຍ໌ໃນພຣະຜູ້ມີພຣະພາຄເພື່ອອະນຸປາທາປະຣິນິພພານ.

ເມື່ອທ່ານພຣະປຸນນະມັນຕານີບຸຕກ່າວຢ່າງນີ້ແລ້ວ ທ່ານພຣະສາຣີບຸຕຈຶ່ງຖາມວ່າ:

ອາວຸໂສ! ທ່ານຊື່ຫຍັງ ແລະເຫລົ່າພິກຂຸເພື່ອນພຣົມມະຈັນຍ໌ຮູ້ຈັກທ່ານວ່າແນວໃດ?

ທ່ານພຣະປຸນນະມັນຕານີບຸຕຕອບວ່າ:

ອາວຸໂສ! ຂ້ານ້ອຍຊື່ ປຸນນະ ແຕ່ເຫລົ່າພິກຂຸເພື່ອນພຣົມມະຈັນຍ໌ຮູ້ຈັກຂ້ານ້ອຍວ່າ ມັນຕານີບຸຕ.

ທ່ານພຣະສາຣີບຸຕກ່າວວ່າ:

ອາວຸໂສ! ໜ້າອັສສະຈັນຍ໌ຫລາຍ ບໍ່ເຄີຍມີມາແລ້ວ ທັມອັນເລິກເຊິ່ງ ອັນທ່ານພຣະປຸນນະມັນຕານີບຸຕເລືອກເຟັ້ນມາກ່າວແກ້ດ້ວຍປັນຍາອັນເລິກເຊິ່ງ ຕາມຢ່າງທີ່ພຣະສາວົກຜູ້ໄດ້ສະດັບແລ້ວ ຮູ້ທົ່ວເຖິງຄຳສອນຂອງພຣະສາສດາໂດຍທ່ອງແທ້ ທີ່ຄວນກ່າວແກ້ ສະນັ້ນ ເປັນລາພຂອງເພື່ອນພຣົມມະຈັນຍ໌ທັງຫລາຍ ຄວາມເປັນມະນຸສອັນເພື່ອນພຣົມມະຈັນຍ໌ທັງຫລາຍໄດ້ດີແລ້ວ ທີ່ໄດ້ພົບເຫັນ ໄດ້ນັ່ງໃກ້ທ່ານພຣະປຸນນະມັນຕານີບຸຕ ເຖິງວ່າເພື່ອນພຣົມມະຈັນຍ໌ທັງຫລາຍຈະເທີດທູນທ່ານພຣະປຸນນະມັນຕານີບຸຕໄວ້ເທິງຫົວດ້ວຍເທີດຜ້າຈຶ່ງຈະໄດ້ພົບເຫັນ ໄດ້ນັ່ງໃກ້ ເຖິງຢ່າງນັ້ນກໍນັບວ່າເປັນລາພຂອງທ່ານເຫລົ່ານັ້ນ ຄວາມເປັນມະນຸສອັນທ່ານເຫລົ່ານັ້ນໄດ້ດີແລ້ວ. ອີກຢ່າງໜຶ່ງ ນັບວ່າເປັນລາພຂອງຂ້ານ້ອຍດ້ວຍ ເປັນກາຣໄດ້ດີຂອງຂ້ານ້ອຍດ້ວຍ ທີ່ໄດ້ພົບເຫັນ ໄດ້ນັ່ງໃກ້ທ່ານພຣະປຸນນະມັນຕານີບຸຕ.

ເມື່ອທ່ານພຣະສາຣີບຸຕກ່າວຢ່າງນີ້ແລ້ວ ທ່ານພຣະປຸນນະມັນຕານີບຸຕຈຶ່ງຖາມວ່າ:

ອາວຸໂສ! ທ່ານຊື່ຫຍັງ ແລະເຫລົ່າພິກຂຸເພື່ອນພຣົມມະຈັນຍ໌ຮູ້ຈັກທ່ານວ່າແນວໃດ?

ທ່ານພຣະສາຣີບຸຕຕອບວ່າ:

ອາວຸໂສ! ຂ້ານ້ອຍຊື່ ອຸປະຕິສສະ ແຕ່ເຫລົ່າພິກຂຸເພື່ອນພຣົມມະຈັນຍ໌ຮູ້ຈັກຂ້ານ້ອຍວ່າ ສາຣີບຸຕ.

ທ່ານພຣະປຸນນະມັນຕານີບຸຕກ່າວວ່າ:

ທ່ານຜູ້ຈະເຣີນ! ຂ້ານ້ອຍກຳລັງເວົ້າຢູ່ກັບທ່ານຜູ້ເປັນສາວົກຊົງຄຸນຄ້າຍກັບພຣະສາສດາ ບໍ່ຮູ້ເລີຍວ່າ ທ່ານຊື່ສາຣີບຸຕ ຖ້າຂ້ານ້ອຍຮູ້ວ່າ ທ່ານຊື່ສາຣີບຸຕແລ້ວ ຄຳທີ່ເວົ້າໄປພຽງເທົ່ານີ້ຄົງບໍ່ແຈ່ມແຈ້ງແກ່ຂ້ານ້ອຍໄດ້ ເປັນກາຣໜ້າອັສສະຈັນຍ໌ຈິງ ບໍ່ເຄີຍມີມາແລ້ວ ທັມອັນເລິກເຊິ່ງ ອັນທ່ານພຣະສາຣີບຸຕເລືອກເຟັ້ນມາຖາມແລ້ວດ້ວຍປັນຍາອັນເລິກເຊິ່ງ ຕາມຢ່າງທີ່ພຣະສາວົກຜູ້ໄດ້ສະດັບແລ້ວ ຮູ້ທົ່ວເຖິງຄຳສອນຂອງພຣະສາສດາໂດຍທ່ອງແທ້ ທີ່ຄວນຈະຖາມ ສະນັ້ນ ເປັນລາພຂອງເພື່ອນພຣົມມະຈັນຍ໌ທັງຫລາຍ ຄວາມເປັນມະນຸສອັນເພື່ອນ ພຣົມມະຈັນຍ໌ທັງຫລາຍໄດ້ດີແລ້ວ ທີ່ໄດ້ພົບເຫັນ ໄດ້ນັ່ງໃກ້ທ່ານພຣະສາຣີບຸຕ ເຖິງວ່າເພື່ອນພຣົມມະຈັນຍ໌ທັງຫລາຍຈະເທີດທູນທ່ານພຣະສາຣີບຸຕໄວ້ເທິງຫົວດ້ວຍເທີດຜ້າຈຶ່ງຈະໄດ້ພົບເຫັນ ໄດ້ນັ່ງໃກ້ ເຖິງຢ່າງນັ້ນກໍນັບວ່າເປັນລາພຂອງທ່ານເຫລົ່ານັ້ນ ຄວາມເປັນມະນຸສອັນທ່ານເຫລົ່ານັ້ນໄດ້ດີແລ້ວ. ອີກຢ່າງໜຶ່ງ ນັບວ່າເປັນລາພຂອງຂ້ານ້ອຍດ້ວຍ ເປັນກາຣໄດ້ດີຂອງຂ້ານ້ອຍດ້ວຍ ທີ່ໄດ້ພົບເຫັນ ໄດ້ນັ່ງໃກ້ທ່ານພຣະສາຣີບຸຕ.

ພຣະມະຫານາຄທັງສອງນັ້ນ ຕ່າງຊື່ນຊົມສຸພາສິຕຂອງກັນແລະກັນດ້ວຍປະກາຣຢ່າງນີ້ແລ.

ມັຊຊິມະນິກາຍ ມູລປັນນາສກ໌ ໑໒/໒໐໑-໒໐໗/໒໙໒-໓໐໐

ຄວາມສັນໂດດເປັນໜຶ່ງໃນທັມທີ່ກະທຳທີ່ເພິ່ງ

ພິກຂຸທັງຫລາຍ! ພວກເຈົ້າທັງຫລາຍຈົ່ງເປັນຜູ້ມີທີ່ເພິ່ງຢູ່ເຖີດ ຢ່າເປັນຜູ້ບໍ່ມີທີ່ເພິ່ງຢູ່ເລີຍ ບຸຄຄົລຜູ້ບໍ່ມີທີ່ເພິ່ງຍ່ອມຢູ່ເປັນທຸກຂ໌.

ພິກຂຸທັງຫລາຍ! ທັມທີ່ກະທຳທີ່ເພິ່ງ ໑໐ ປະກາຣນີ້, ໑໐ ປະກາຣເປັນຢ່າງໃດ?